Në Departamentin për Krime të Luftës në Policinë e Kosovës, të enjten, Shoqata për Krime Lufte “Gjakova 98-99” dorëzoi kontingjentin e 14-të të padive kundër serbëve që dyshohet se kanë kryer krime lufte, raporton KP-ja.
Shkëndije Hoda, përfaqësuese e kësaj organizate, tha se paditë kanë të bëjnë me krimet e kryera nga serbët në datat 7, 8, 9 dhe 10 maj 1999. Bëhet fjalë për 100 padi të reja.
“Më 7, 8, 9 dhe 10 maj është kryer një luftim jashtëzakonisht i ashpër në Komunën e Gjakovës. Janë të vrarë, ekzekutuar dhe masakruar diku 97 qytetarë. Të burgosur kanë qenë 347 të cilët më tutje janë lëshuar disa, e disa të tjerë janë mbajtur në burgjet e Serbisë. Kemi dosjet e 23 të vrarëve në burgun e Dubravës, gjithmonë flasim për periudhën 7, 8, 9 dhe 10 maj, të cilët janë marrë peng në atë periudhë dhe janë të komunës së Gjakovës. Pjesa tjetër është dosja e 112 fëmijëve të vrarë, të ekzekutuar në mënyra të ndryshme pikërisht në Komunën e Gjakovës. Dhe një dosje tjetër që ne mendojmë se çdo qytetar i cili i ka këto dosje duhet t’ia sjellë policisë, është dosja e kriminelëve pjesëmarrës në këto data”, tha Hoda.
Ajo sic njohton Kosovapress”, tha se në Shoqatë janë të kënaqur me punën që po bëhet nga gjykatat në vend.
“Ju po i shihni rezultatet edhe në gjykata veçse ka filluar arrestimi i kriminelëve të luftës, i keni rastet e fundit për përdhunime seksuale që është një nismë e mirë. Presim, çdo e mirë vjen ngadalë”, u shpreh ajo.