Universiteti “Fehmi Agani” në Gjakovë, po vazhdon të krijojë miqësi e lidhje të reja bashkëpunimi me universitetet të shumta në Shqipëri dhe në shtete tjera të Evropës. Pas nënshkrimit të marrëveshjes më Universitetin e Torinos për shkëmbimin e studentëve dhe programeve universitare, rektori i Universitetit të Gjakovës, Prof. Dr. Shaban Buza dhe Rektori i Universitetit të Elbasanit, Prof. Dr. Liman Varoshi, kanë nënshkruar marrëveshje bashkëpunimi ndëruniversitar. Kjo marrëveshje u cilësua si bashkëpunim dhe integrim kombëtar në arsimin e lartë.
Rektori Buza falënderoi rektorin Varoshi për vizitën, gatishmërinë për bashkëpunim në programe të përbashkëta të studimit, duke cekur se Universiteti i Gjakovës si institucion i ri ka nevojë për ngritje profesionale të kapaciteteve pedagogjike e hulumtuese, shkëmbime të nivelit akademik dhe të studentëve, si dhe përfshirjen e përbashkët në projekte hulumtuese kombëtare e ndërkombëtare.
Ndërkaq, rektori Varoshi duke konfirmuar gatishmërinë për thellimin e këtij bashkëpunimi, më tepër foli për historikun e Universitetit të Elbasanit, transformimin nga shkolla normale dhe rëndësinë që ka sot ky universitet në krijimin e kuadrove të reja.
Ceremonia e nënshkrimit të Marrëveshjes së bashkëpunimit ndëruniversitar u zhvillua në lokalet e Rektoratit të Universitetit të Gjakovës, ku përveç stafit menaxherial dhe akademik të të dy universiteteve, morën pjesë edhe Prof. Asoc. Dr. Ramë Likaj, këshilltar i ministrit Arsim Bajrami; znj. Mimoza Kusari-Lila, kryetare e Gjakovës dhe Prof. Dr. Luan Ahma, kryetar i Këshillit Drejtues të UGJFA-së, të cilët e përshëndetën këtë aktivitet dhe siguruan mbështetje të vazhdueshme.
