Me fat Kurban Bajrami

Myslimanët në mbarë botën sot po festojnë Kurban Bajramin, i cili tek shqiptarët njihet ndryshe edhe si Bajrami i Vogël. Ceremonia kryesore  në vend është mbajtur si rëndom në Xhaminë e Madhe në Prishtinë, ku prezent kanë qenë një numër i madh besimtarësh, si brenda xhamisë ashtu edhe në oborrin e saj. Ndërkaq në Gjakovë, ceremonia qendrore e faljes së Kurban Bajramit  është mbajtur në xhaminë e Hadumit. Me këtë rast u tha se Festa e Kurban Bajramit  vjen pasi besimtarët kryejnë Haxhin dhe therin Kurbanin dhe ajo  sjellë mënyrën më të mirë për mësimet hyjnore për barazi, drejtësi, unitet, solidaritet, bamirësi e sakrificë, parime këto që bëjnë njerëzimin të reflektoj në të mirën dhe në atë që e do Krijuesi i gjithësisë.

Me rastin e festës së Kurban-Bajramit, Kryetari i Këshillit të Bashkësisë Islame Gjakovë, Ahmet ef.Hoxha bashkë me imamët, nga ora 9:00, organizuan pritje urimi.
Për t’iu uruar festën e Kurban Bajramit zyrat e KBI në Gjakovë i vizituan Kryetarja e Komunës së Gjakovës Mimoza Kusari Lila me bashkëpunëtorë. Përfaqësuesit e PD-së, LDK-së, AAK-së, PDK-së, VV-së, Nismës për Kosovën, përfaqësuesit e policisë së Kosovës dhe qytetarë të shumtë nga qyteti dhe fshati.

Në emër të KBIGJ-së, kryetari Hoxha falënderoi të gjithë mysafirët dhe shfrytëzoi rastin që urimin t’ua dërgoj edhe qytetarëve të Gjakovës. “Shfrytëzoj rastin që në emrin timin personal dhe në emër të stafit të imamëve të nderuar, të gjithë qytetarëve tanë t’ju shprehi urimet dhe përgëzimet më të ngrohta dhe më të përzemërta me rastin e kësaj feste madhështore të Kurban Bajramit.”