Ka vite që komunës i ka dorëzuar një kërkesë për shpalljen ‘Qytetar nderi të gazetarit David Charter. Në arsyetimin e tij Dr. Besnik Bardhi mes tjerash kishte shkruar: Më dt. 13. 06. 1999, pas 78 ditë bombardimesh të caqeve serbe nga Aleanca Veriatlantike, si dhe të masakrave të papara të forcave serbe ndaj popullatës së pafajshme të komunës sonë, në qytetin e Gjakovës në orën 15.15 minuta. Nga drejtimi i Prizrenit, hyri me automjetin e tij, gazetari i SKY NEËS-it, reporter special i shumë luftërave, David Chater. Edhe pse ishte rrezik imadh, sepse në afërsi kishte forca të mëdha serbe, një grup qytetarësh, ia preu rrugën automjetit të këtij gazetari, pikërisht te trekëndëshi i Tranzitit, në afërsi të stacionit policor. Në mesin e atyre qytetarëve kam qenë dhe unë personalisht, si pjesëmarrës dhe dëshmitar i gjallë i ngjarjes. Në ato momente, Gjakova digjej nga të katër anët dhe dëgjoheshin detonime e rafale të pandërprera automatikësh. Ky grup i qytetarëve, shumë të shqetësuar dhe të dërmuar, i shpjeguan gazetarit anglez se çfarë po ndodhte aktualisht në qytetin e Gjakovës. Ai shfaqi habi nga ajo çfarë pau dhe dëgjoi në ato momente.
E më në fund, pas kater kerkesave që nga viti 2008, 2010, 2011 dhe 2012, me këto asyetime gazetari britanik i “Sky Neës” David Chater mund të shpallet qytetar nderi i komunës së Gjakovës me arsyetimit se me 13 qershor të vitit 1999 ka ndikuar tek trupat italiane të KFOR-it të hyjnë para planifikimit në qytetin e Gjakovës, duke e parandaluar kështu një masakër të madhe mbi banorët e këtij qyteti.
Vendimi për këtë akt pritet ta marrë Asambleja komunale e Gjakovës në mbledhjen e muajit prill, ndërsa ceremonia e nderimit të gazetarit, pritet të ndodhë në muajin qershor.
Këtë e ka konfirmuar edhe zëdhënësi i komunës së Gjakovës Ali Tafarshiku. “Në bashkëpunim me kryetaren Kusari – Lila, kryesuesi i Asamblesë komunale Luan Gola i ka filluar të gjitha procedurat e rregullta që kjo çështje të futet për diskutim si pikë e rendit të ditës për mbledhjen e radhës të Asamblesë komunale, institucion i cili edhe do të vendosë nëse gazetari Chater do të shpallet qytetar nderi i Gjakovës”, ka thënë Tafarshiku.
E ky lajm e ka gëzuar jashtë mase mjekun gjakovar Besnik Bardhi, i cili është iniciatori kryesor që Chater të shpallet qytetar nderi i Gjakovës. Bardhi e ka përseritur çdo vit këtë kërkesë që nga viti 2008 kur vet ishte pjesë e Asamblesë komunale, por që nga atëherë ndonëse ka marrë premtime, kërkesa e tij nuk ishte realizuar asnjëherë. “Veprim i vonuar por megjithatë më ka gëzuar shumë. Aprovimi dhe realizimi i kësaj ideje, e nderon shumë qytetin tonë, i reflekton përjetësisht orientimet tona demokratike dhe liridashëse, si dhe ndjenjat tona miqësore sidomos ndaj aleatëve tanë ndërkombëtarë, që ishin të përfshirë në luftën e vitit 1998-1999 në Kosovë”, ka thënë Bardhi.
Ndryshe, me 13 qershor të vitit 1999, Chater ishte ndërkombëtari i parë që ishte futur në qytetin e Gjakovës, ku kishte kuptuar se forcat serbe ishin duke e përgatitur një masakër të madhe mbi civilët shqiptar. Ai ishte kthyer mbrapa për disa kilometra, në fshatin Rogovë të Hasit, për ta bindur komandantin e trupave të KFOR-it italian, gjeneralin Del Vechio që të mos udhëtonte drejtë Pejës përmes Aksit Klinë – Pejë ashtu siç ishte planifikuar, por paraprakisht të futej në Gjakovë, për ta mbrojtur popullatën civile.