Aeroporti i Gjakovës përplas anëtarët e kabinetit qeveritar

Qeveria e Kosovës ka miratuar propozimin e ministres së Tregtisë dhe Industrisë për formimin e një Komisioni për transferimin e aeroportit ushtarak të Gjakovës nga ministria e mbrojtjes italiane tek autoritetet vendore. Por kjo çështje nuk kaloi pa përplasje të hapur ndërmjet anëtarëve të kabinetit qeveritar.

Ministrja Lila arsyetoi propozimin e saj me faktin që  Ministria italiane e  mbrojtjes ka kërkuar që të bëjë transferimin e këtij aeroporti që ishte në shfrytëzim të tyre tek  qeveria e Kosovës. me këtë rast ajo ka propozuar të gjithë institucionet e Republikës së Kosovës të cilat në bazë të kompetencave të tyre ligjore, që të japin kontribut me rastin e transferimit të aeroportit ushtarak të Gjakovës.

Kështu ajo ka propozuar që komisioni të përbëhet nga MTI, Ministria e infrastrukturës, Zyra e kryeministrit, MPB, Ministria e Administratës Publike, MPJ , MEF, MZHE, Agjensioni i aviacionit civil si dhe një përfaqësues i Ambasadës italiane në  Prishtinë. Ajo e quajti si shumë të rëndësishme që ky komision do të jetë përgjegjës për zhvillimin e procedurave për transferimin e aeroportit ushtarak të Gjakovës.

Mirëpo ky propozim i dalur nga Ministria e Tregtisë nuk i pëlqeu ministrit të  FSK Agim Ceku duke pyetur pse MTI të merret me aeroportin.

“Ça ka lidhje aeroporti me biznes apo tregti pasi kjo ka të bëjë me ushtri, mundet me polici, bujqësi, sport. Ka shumë institucione tjera që mund t’ia caktojnë mënyrën se çfarë do të bëhet me këtë aeroport. Ndoshta ministria e planifikimit hapësinor do të propozojë me e rrënuar krejt dhe ti kthejë në arra si ka qenë më herët”, tha ai duke sugjeruar që duhet me qenë një komision pak më gjithëpërfshirës dhe më serioz.

Mirëpo as Kusari nuk i mbeti borxh duke ia kthyer një kundërpërgjigje në formë arsyetimi me ironi.  Ajo e falënderoi ministrin Çeku për respektin sic tha “informatat për MTI. Unë prezantova në rolin e zëvendëskryeministres se qeveris së Kosovës. Ky aeroport përmban asete shumë të rëndësishme për secilin aeroport në faza të mëtutjeshme pa marrë parasysh destinacionin nëse do të jetë destinacion, komercial, ushtarak apo akademik”, tha Kusari.

Duke u kapur për deklaratë të Cekut, ministrja Kusari tha se shumë lehtë aeroporti mundet të mbetet fushë bujqësore, pastaj të ushtrohen aktivitete kulturore ose diçka tjetër pasi ministria italiane e mbrojtjes shumë thjeshtë mundet në periudhën e shkurtimeve buxhetore që i kanë, të tërheq të gjitha mjetet në Itali.

Ministri I Punëve të Brendshme Bajram Rexhepi duke i dhënë mbështetje kësaj nisme tha se me pak investime në zgjerimin e pistës ky aeroport mund të jetë I shfrytëzueshëm për aterrimin e aeroplanëve të mëdhenj dhe të jetë një alternative e aeroportit aktual meqë nuk ka mjegull.

“Transferi duhet të bëhet ndërsa është çështje e qeverisë pastaj edhe rregullativave tjera se a mund të shërbejë si aeroport alternativ apo komercial apo arsye tjera”, tha Rexhepi.

Ndërsa Mahir Jagxhilar ministër i Administratës Publike  ndonëse i dha mbështetje kësaj nisme kërkoi që komisioni ta kryesohet nga ministria që ai drejton pasi fjala është për asete shtetërore.

“Sa i përket transferimit rolin kryesor duhet ta ketë Ministria e Administratës publike, por në kryesim me një prej zëvendëskryeministrave”, tha ai.  Pretendimet për rolin udhëheqës të këtij komisioni dhe reagimet ndaj kësaj nisme të MTI nga disa anëtarë të kabinetit, ka bërë që të ‘kollitet” fortë zëvendëskryeministri i Qeverisë Bexhet Pacolli duke u shprehur se po e befason fakti që ka kundërshtime.

“Ku keni qenë deri tash, nëse mund të pyes, që se keni ngritur këtë problem. Por tani reagoni pasi është bërë puna. Është një iniciativë për ta përshëndetur se është një aset shumë i vlefshëm për Kosovën”, ka thënë Pacolli. Por zëvendëskryeministri Hajredin Kuci tha se në komision duhet me qenë edhe përfaqësuesi i ministrisë së FSK-së dhe Avokaturës shtetërore respektivisht një jurist, pasi ai duhet të jetë kujdestar i kontratave eventuale apo marrëveshjeve.

marrë nga g azetaditore.com