Kënga korçare ka jehuar të enjten në mbrëmje në skenën e Shkollës së muzikës Prenk Jakova në Gjakovë. Atë e sollën këngëtarët Spanja Pipa dhe Vaskë Jani, të shoqëruar nga ansambli instrumental, Josif Minga fizarmonikë, Tomor Selimi kitar dhe Agron Murati- llautë. Gjatë koncertit këndoi edhe publiku gjakovar që edhe me këtë rast shprehu dashurinë për muzikën korçare. Befasi e këndshme padyshim se ishte këngëtarja e shquar që merret edhe si identifikuese e këngëve korçare tash gati 80 vjeçare që me aq sukses interpretoi këngë në shtrirje kohore gati 100 vjeçare. Disa nga këto këngë u dëgjuan për herë të parë.
Për të ishte ëndërr vizita në Gjakovë. “
“ U mrekullova me këtë ambient dhe me këtë publik. Kam ëndërruar të vijë në Gjakovë. E pash se sa të dashura janë serenatat korçare për këtë qytet që më pëlqeu shumë dhe që kishte ngjashmëri me Korçën.
“Serenata është një zemër në qelq dhe zemra troket gjithmonë. Në Korçë u këndonin vajzave me kitarë. Djali që më deshi mu nuk më zinte të më thoshte të dua. Vinte e thoshte “Këtë këngë që tash e dëgjoj, këtë këngë për ty e këndoj”. Unë nga gëzimi e hapja perdet dhe shikoja. Serenatat i janë kushtuar dashurisë”, tha Spanja Pipa.
Në fund të koncertit në skenë u ngjit edhe doajeni i këngës shqipe Ismet Peja i cili këndoi disa këngë korçare.
Kompozitori I njohur Josif Minga që kishte përgatitur këtë koncert dhe të cilin e udhëhoqi tha se kanë kaluar një mbrëmje të këndshme në qytetin e këngës. Ai tha shkurt: “Kur këndon Gjakova, dëgjon Kosova”…
Koncerti me titull “Nostalgjia e këngës Korçare” u organizua nga Ambasada e Shqipërisë në Kosovë në bashkëpunim me Komunën e Gjakovës.
Paradite u mbajt një ligjëratë me nxënësit e shkollës së muzikës nga kompozitori Josif Minga, me temën “Muzika, art i përsosmërisë së dëgjimit dhe kënga popullore Shqiptare”. Me këtë rast ai dha vlerësime të larta për muzikën shqipe.
