Një ditë para ndërrimit të moteve në komunën e Gjakovës po ndjehet atmosfera festive. Në mesditë e në mbrëmje rrugët mezi absorbojnë numrin e madh të automjeteve. Kanë ardhë për festime edhe një numër i konsiderueshëm i bashkatdhetarëve tanë që jetojnë e punojnë në botën e jashtme. Rrugët kryesore dhe një pjesë e bizneseve dhe shtëpive të gjakovarëve tashmë janë dekoruar ndërsa qendrat tregtare këtyre ditëve janë gjallëruar më tepër nga konsumatorët që bëhen gati për të siguruar produktet e nevojshme ushqimore e tjera për ta bërë ambientin familjar sa më festiv. Objektet hoteliere ka kohë që kanë ftuar mysafirët në ambientet e veta ku i prêt një meny e begatshme dhe program I pasur kulturo artistik, sipas të cilit janë hartuar edhe çmimet. Por si edhe viteve tjera pjesa dërmuese e bashkëqytetarëve tanë natën e ndërrimit të moteve do ta kalojnë në ambientet familjare në shoqëri me programet argëtuese televizive. Një pjesë kryesisht e të rinjve ndërrimin e moteve do ta presin në ambient të hapur mes fishekzjarrëve. Komuna ka organizuar sheshin festiv në parkun qendror. Do të jenë të hapura edhe një numër i kafeterive e diskotekave ku me muzikën e zgjedhur do të këmbehen urimet e para të Vitit të Ri.
Ndryshe Institucionet publike po bëjnë vlerësimet e fundit për punën e bërë gjatë këtij viti ndërsa nuk po mungojnë as dhuratat për familjet e varfra.