Gjakovë- “Pa mbështetjen e PDK-së edhe Kusari-Lila, por edhe Lekaj le ta harrojnë se mund të fitojnë. Gjithashtu, dua të ju rikujtoj se askush nuk do ta ketë mbështetjen e elektoratit të PDK-së, pa një marrëveshje me ne”, kështu ka thënë Hajdar Beqa, kryetar i PDK-së në Gjakovë i cili ka thirrur një konferencë për media.
Beqa ka thënë se në adresë të partisë së tij kanë ardhur oferta serioze per koalicion nga dy partitë si AKR-ja, poashtu edhe AAK-ja, por dega e tij nuk ka vendosur ende dhe këtë gjë pritet ta bëjnë nga fillimi i javes së ardhshme.
“Kemi oferta nga dyja kampet dhe janë mjaft serioze. Ato përfshiejnë ndarje të pushetit 50/50, por strukturat e degës do të mblidhen dhe do të dalim me një vendim”, u shpreh Beqa. Kusht, sipas tij, për një koalicion është afërsia e programit të partisë së tij me partinë tjetër.
I pyetuar nëse është “për ndryshim” apo për “vazhdim”, Beqa tha se ai është për ndryshime rrënjësore, porse ndryshimet siç mund të bëhen me AKR-në, ato mund të bëhen edhe me AAK-në.
Beqa ka thënë se në rast se PDK-ja bëhet pjesë e një koalicioni që do qeverisë ateherë ato do jenë në shërbim të qytetarit, ndërsa në rast se vendosin të qëndrojnë si opozitë ajo do jetë mjaft konstruktive. Ai ka shtuar se PDK-ja deri më tani ka siguruar gjashtë ulëse në Asamble dhe janë në pritje të së shtates.
Në këtë konferencë Beqa ka falenderuar mediat për pasqyrimin real të aktiviteteve, strukturat e degës, komisionerët, simpatizantët dhe votuesit për mbështetjen e madhe që kanë bërë që kjo parti të ketë një rritje trefishore në Gjakovë./radiogjakova/