Pas një jave me promovime librash, tribunën letrare dhe me orën e madhe letrare, ku poetë nga trevat shqiptare dhe mysafir nga bota lexuan poezitë e tyre, ka përfunduar mbrëmë mitingu i 55 me radhë i poezisë ku u ndanë edhe çmimet tradicionale. Poeti Skender Buqpapaj ka marrë çmimin kryesor të mitingut në jubileun e 55-të. Këtë çmim e ndau Muharrem Kurti kryetar i klubit letrar Gjon Nikollë Kazazi.
Vepra “Vitet që nuk sollën pranverë” të autorit Xhevdet Bajraj u vlerësua me çmimin e parë Din Mehmeti për librin me poezi më të mirin të botuar mes dy mitingjeve. Për këtë, arsyetimin e dha kryetari i jurisë, kritiku letrar Ramadan Musliu. Krijuesja e njohur Flutura Açka rrëmbeu çmimin Ali Podrimja për poezinë me titull “Gri”, si poezia më e mirë e lexuar në orën e madhe letrare në Gjakovë. Fituesja e këtij çmimi Flutura Açka u shprehë falënderuese për këtë mirënjohje që i bëhet krijimtarisë së saj.
U nda edhe Çmimi Yllka Domi që kësaj radhe i takoi poetes gjakovare që jeton në diasporë, Shqipe Bytyqi. Ajo u shprehë e lumtur për faktin se çmimi mbanë emrin e poetes dhe dëshmores Yllka Domi.
Ndryshe krahas shumë poetëve nga Kosova e Shqipëria, këtë edicion të Mitingut e kanë madhështuar me pjesëmarrjen e tyre edhe poetët ndërkombëtar Rikardio Rubio nga Argjentina, i cili u nderua me çmimin Nënë Tereza dhe Maria Sameiro Do Barroso nga Portugalia, dhe Laura Garavaglia nga Italia për të cilët komuna e Gjakovës ndau mirënjohje.
Dita e djeshme ishte e mbushur aktivitete të shumta që kishte nisur me oren letrare për fëmijë tek sheshi nënë tereza pastaj kishin vazhduar gjatë gjithë ditës me orët letrare në Junik si dhe në Fakultetin Filologjik, në Gjakovë. Tribuna Tradicionale e Mitingut me temën “Letërsia shqipe dhe politikat kulturore” ku Ligjëruan : Flutura Açka dhe Dr. Ibrahim Berisha, nxori mendime, vlerësime e kritika nga të pranishmit.
