Gjakova po kalon ditët më të ftohta të dimrit. Bora deri në 25 centimetra dhe ngricat në rrugë , bashkë me fërfëlliza e kanë vështirësuar përditshmërinë tonë, posaçërisht qarkullimin normal të trafikut. Rrugët kryesore të qytetit tashmë janë pastruar nga bora dhe trafiku po zhvillohet me vështirësi por, pas borës dhe uljes së temperaturave të ajrit në rrugë, janë krijuar shtresa të mëdha akulli që po paraqesin rrezik si për shoferët ashtu edhe për këmbësorët. Në Policinë Rajonale të Trafikut në Gjakovë kanë thënë se brenda 24 orëve të shkuara si pasojë e borës dhe ngricave, në rrugët regjionale në Gjakovë, Rahovec dhe Malishevë janë shkaktuar 4 aksidente trafiku të cilat fatbardhësisht kanë përfunduar vetëm me dëme materiale. Ata këshillojnë shoferët për reduktim të lëvizjes me automjete dhe gjithsesi mosdalje në rrugë pa pajisjen e nevojshme dimërore.
Ngricat në rrugë janë të rrezikshme edhe për këmbësorët bazuar edhe në praktikat e viteve të shkuara kur nga rrëshqitjet, një numër i bashkëqytetarëve ka pësuar thyerje nyjesh dhe dëmtime tjera trupore. Prandaj mjekët ortoped këshillojnë këmbësorët që në të tilla rrethana të rrugëve me akull të kenë kujdes gjatë lëvizjes, që të mos pësojnë nga rrëzimet.
Në rrethanat e të ftohtit të madh, qytetarët, nga KRU Radoniqi janë të këshilluar që të kenë kujdes edhe tek mirëmbajtja e rrjetit të ujësjellësit për të mos ardh deri te pëlcitjet e orëmatësve dhe rrjetit brenda shtëpive.
Edhe zjarrfikësit tërheqin vërejtjen për një kujdes të shtuar rreth pajisjeve ngrohëse, posaçërisht të stufave me dru, në ambientet familjare. Nevoja për ngrohje maksimale në temperaturat e ulëta dhe pakujdesia rrisin rrezikun nga zjarri dhe djegia e oxhaqeve.