Wednesday, June 5, 2024
AktualeLajme

Debat me qytetarët për fatin e QKMF-së

tubim me tetar qkmfKomuna e Gjakovës e ka organizuar të shtunën debatin  publik për fatin e Qendrës Kryesore të Mjekësisë Familjare, e cila aktualisht është jashtë funksionit për shkak të ndërprerjes së punimeve për restaurimin e saj.

 Fillimisht, kryetarja e komunës Mimoza Kusari – Lila, para punëtorëve të QKMF-së dhe qytetarëve të Gjakovës i ka treguar edhe një herë arsyet e ndërprerjes së punimeve dhe zhvillimet më të reja në këtë drejtim. Ajo ka njoftuar se ka marrë vendim për ndërprerje të punimeve për faktin se ka qenë kontratë pa mbulesë nga ish – qeveria dhe se punimet e kontraktuara nuk kanë qenë të detajuara.  Në ndërkohë, në objekt ka pasur edhe një avari të madhe në rrjetin elektrik, fakt që po ashtu e ka përkeqësuar gjendjen e objektit.

Nga ana tjetër, drejtori komunal për shëndetësi Basri Komoni i ka prezantuar para qytetarëve dy opsionet e mundshme, për të cilat e ka kërkuar edhe qëndrimin e qytetarëve.

Sipas tij, opsioni i parë, që është vazhdimi i punimeve në QKMF dhe vazhdimi i aktivitetit të plotë aty është opsion më i pa pranueshëm, për faktin se objekti aktual është shumë i vjetruar dhe rregullimi i tij ka kosto të madhe, kosto që mund të vazhdojë të jetë e madhe edhe në të ardhmen.  Ai ka shtuar se propozimi më i mirë është ndërtimi i një objekti të ri dhe modern të QKMF-së, i cili është paraparë të ndërtohet në lokacionin në mes të stadiumit të qytetit dhe Shkollës së Mesme të Mjekësisë “Hysni Zajmi”. Sipas drejtorit Komoni, objekti i ri do të jetë qendër kryesore e mjeksisë familljare, ndërsa objekti aktual do të ketë në funksion vetëm disa nga segmentet e tanishme.

E për ndërtimin e objektit të ri, që pritet të kushtojë rreth 500 mijë euro, kryetarja e komunës Mimoza Kusari – Lila ka thënë se komuna nuk do t shpenzojë asnjë cent, sepse ky projekt do të prezantohet në konferencën e donatorëve nga ku edhe do të dalin mjetet për ndërtimin e tij.

E lidhur me këto propozime të komunarëve, qëndrimet e qytetarëve kanë qenë të ndryshme. Në fakt shumica prej tyre e kanë pranuar idenë e një ndërtimi të ri, por ka pasur edhe të tillë, kryesisht tregtarë të asaj pjese, të cilët janë ankuar se me largimin e QKMF-së, atyre do tu pakësohet qarkullimi tregtar.