Drejtori i Policisë Graishta: Gjakova është një ndër komunat më të përgjegjshme

Policia rajonale në Gjakovë e vlerëson të qetë gjendjen e sigurisë në komunat Gjakovë, Rahovec dhe Malishevë. Drejtori rajonal i Policisë së Kosovës në Gjakovë, Lumni Graishta  i tha Radio Gjakovës , se ka qenë një javë  plot angazhime në respektim të vendimeve të fundit të Qeverisë së Kosovës për parandalimin e pandemisë. Megjithë sfidat, policia ka arritur të jetë në  ballë të detyrës.

“Kjo javë , normalisht si edhe javët paraprake ka qenë mjaft e ngarkuar me aktivitete dhe me angazhimin nga ana e Policisë së Kosovës,  por edhe mekanizmave dhe institucioneve tjera,  qoftë ato të nivelit lokal apo qendror. Megjithatë ne konsiderojmë që ka qenë një javë e qetë edhe për punë të angazhimeve të shumta. Edhe përkundër ngarkesave të mëdha konsiderojmë që ka qenë një javë e qetë në aspektin e sigurisë. Gjatë kësaj jave të fundit nga e Hëna e deri  të Premten  kemi 9 raste të iniciuara,  10 persona të ndaluar me vendim të Prokurorit, ndërsa të arrestuar kemi 28 persona që kanë ra ndesh me urdhëresat dhe me vendimet e Qeverisë . Megjithatë këto statistika i referohen të tri komunave: Gjakovës, Malishevës dhe Rahovecit. Sa i përket vetëm komunës së Gjakovës unë mund të konsideroj që është një ndër komunat më të ndërgjegjshme,  më të përgjegjshme dhe që po i përmbahet në mënyrë më të mirë të mundshme kufizimeve të lëvizjes por edhe të respektimit të normave tjera”, ka thënë drejtori Graishta.

Kolonel Graishta ka apeluar për një bashkëveprim në luftën për mbrojtje nga korona virusi për faktin se është në interesin e përbashkët. Ai ka lutur qytetarët që të respektojnë urdhëresat e organeve të larta shtetërore duke përmendur se  apeli më i mirë e më i përshtatshëm për të gjithë qytetarët do të ishte që ti respektoni vendimet e institucioneve qendrore dhe atyre lokale.

“Ti  referohemi kohës së lëvizjes,  atëherë kur juve iu lejohet. Mos të grumbulloheni . Të evitojmë sa të mundemi dhe të parandalojmë mundësitë e përhapjes së mëtutjeshme të këtij virusi të rrezikshëm. Gjithçka që bëjmë, bëjmë për vete,  për familjet tona dhe për shoqërinë tonë. Andaj vlerësojë që nuk ka asgjë më të shenjtë se familja dhe shoqëria,  kështu që ti ruajmë , sepse e kemi mundësinë. Është në dorën tonë ti ruajmë e të mos i rrezikojmë,  të mos i cenojmë as shëndetin dhe as sigurinë e tyre” , ka përfunduar i pari i Policisë së Kosovës për regjionin e Gjakovës, kol. Lumni Graishta.