NTERVISTA : Elsa Haxhija, vullnetarja kosovare e vitit 2020
Marrë nga numri i fundit i revistes Gjakovapress Nr.144
Gjimnazistja e vitit të tretë të shkollës Hajdar Dushi në Gjakovë, e cila edhe këtë vit shkollor e mbylli me sukses të shkëlqyeshëm, Elsa Haxhija po shkëlqen edhe në veprimtaritë vullnetare rinore. Ky aktivitet i sajë është një humanitet i cili buron nga shpirti për t’i ndihmuar të tjerët dhe për këtë angazhim, në fundvit mori çmimin Vullnetarja e vitit, që e ndau Ministria e Kulturës, Rinisë dhe Sporteve të Kosovës dhe UNICEF. E dashur, e sjellshme, e palodhshme, inteligjente, Elsa tashmë është bërë shembull për moshataret e veta.
Si e përfunduat këtë periudhë shkollore ?
Edhe pse në situatë të jashtëzakonshme pandemie edhe nxënësit edhe stafi shkollor janë munduar maksimalisht që ky vit të ketë sukses. Duhet falënderuar mësimdhënësit edhe pse në këto kushte të vështira arritën të plotësonin kushtet. Mendoj që është një eksperiencë e mirë për ne sepse duhet të mësojmë edhe si të përballemi me situata të vështira.
Si e keni pritur çmimin si Vullnetarja e Vitit 2020 nga MKRS ?
Këtë çmim e kam pritur me shumë gëzim sepse puna e vullnetarëve edhe të rinjve të Kosovës po njihej. Jam ndjerë shumë e nderuar si dhe shumë entuziaste sepse do të ishte një reflektim i mirë për moshatarët dhe në të ardhmen puna vullnetare do të vlerësohej dhe të kuptohej edhe më shumë !
Sa është puna vullnetare e rëndësishme për shoqërinë tonë ?
Puna vullnetare është shumë e rëndësishme dhe patjetër që ka ndikim pozitiv në shoqëri. Duke bërë punë vullnetare ne bëjmë mire për të tjerët dhe komunitetin si dhe krijojmë shumë benificione për vetën si shpirtërisht ashtu edhe në ndërtim të personalitetit. Një vullnetar nuk do të thotë të jetë i ri sepse punë vullnetarë bëjnë edhe më të moshuarit, shpirti i vullnetarit dhe vullnetarizmi nuk njeh moshë !
Sa i kushtohet kujdes vullnetarizmit dhe sa janë të përfshirë të rinjtë e Gjakovës ?
Vitet e fundit kam pasur mundësi të vërej që rinia e Gjakovës është e përfshirë dhe ka njëlloj dashurie për vullnetarizmin, edhe pse ka të rinj që nuk merren intensivisht me punë vullnetare por thjesht e kanë shpirtin e vullnetarit dhe interesohen për evente të ndryshme me baza vullnetare që organizohen nga OJQ si KVRL dhe YMCA. Mendoj që rol të rëndësishëm luan edhe mbështetja që kemi ne si rini për njëri tjetrin.
Çfarë mund të na thoni për përfshirjen tuaj në KVRL ?
Unë jam pjesë e KVRL që gati 3 vite e gjysmë, fillimisht kemi nisur si një grup i vogël shoqëror me një aktivitet të organizuar bashkë me klubin e çiklizmit KC Gjakova 137, ku mund të them që nga këtu ka fillu dashuria ime për punën vullnetare . Më tutje jam përkushtuar më shumë në punën për komunitet dhe të rinj. Përveç KVRL jam edhe Peer Trainer në YMCA.
Cilat janë disa nga arritjet tjera përveç vullnetares së vitit ?
Kam marr certifikatën e artë të Leadershipit në YMCA për të cilën si unë edhe shume vullnetarë jemi munduar dhe kemi bërë punë të vazhdueshme për 2 vjet e gjysmë. Gjithashtu jam e certifikuar për punëtoritë UPSHIFT, PODIUM DHE PONDER , vullnetare në klubin e gjelbër si dhe mirënjohje të ndryshme nga KVRL për pjesëmarrje në aktet vullnetarë për bamirësi, ambient etj.
Sa ndikon pjesëmarrja në aktivitete të këtilla tek të rinjtë në formimin e personalitetit ?
Pjesëmarrja ndikon shumë, me plot gojë mund ta them se po të mos ishte puna vullnetare, organizatat dhe aktivitetet nuk do të kisha karakterin apo personalitetin që kam sot ! Mendoj që këto gjëra na ndihmojnë të lidhemi më shumë më shpirtin e komunitetit dhe të jemi më empatik me çfarë po ndodh në komunitet. Sepse duhet të veprojmë bashkë si qytetari aktive.
Meqë e përmendëm edhe çiklizmin, prej nga vjen dashuria jote për të ?
Dashurinë për çiklizmin e kam nga babai(Agimi) gjithashtu edhe dashurinë për vullnetarizmit e kam burim nga puna e babit dhe mund të them që po të mos filloja me çiklizëm nuk do të arrija këtu, sepse ka qenë gjëja më e mirë që më ka ndodhur në vitet e rritjes. Vitin e fundit nuk kam mundur të përkushtohem shumë për shkak të angazhimeve tjera por nuk do të thotë që e kam lënë tërësisht pas dore dhe të paktën mundohem që të shpërndaj mesazhin tek të tjerët se sa e rëndësishme është .
