“Fati im” 680 kontrolla falas në muajin e luftës kundër kancerit të gjirit

Parandalimi dhe zbulimi i hershëm i kancerit të gjirit është një nga mënyrat më të mira për zvogëlimin e pasojave dhe komplikimeve të sëmundjes, ndaj shoqëria kosovare po bënë përpjekje që në forma të ndryshme të ngrisë vetëdijen tek qytetarët. Në këtë kontekst me rastin e muajit të luftës kundër kancerit të gjirit, i cili edhe këtë vit është organizuar nën patronatin e presidentes së Kosovës Atifete Jahjaga, Spitali Special “FATI IM” në bashkpunim me Qendrën Kosovare për luftimin e kancerit të gjirit “JETA – VITA” në Prishtinë, prej 1 deri më 31 Tetor, ka bërë falas 680 kontrolla prej të cilave 270 vetëm në Gjakovë.

Dr. Afrim Muhaxhiri nga klinika “Fati Im” tha se për dallim nga viti i kaluar ka numër në rritje të grave që kanë shfrytëzuar këto shërbime falas: ekzaminimi klinik i gjirit, ultrasonografia e gjirit, punksioni aspirativ, CN Biopsia, përcaktimi markerëve të tumorëve në serum dhe analiza tjera.

“Pas ekzaminimeve të 680 pacienteve në mes tyre janë diagnostifikuar 4 gra me tumor beninjë që nuk është i rrezikshëm për shëndetin, dhe vetëm dy raste janë diagnostifikuar me kancer të gjirit” tha Muhaxhiri.

Lidhur me përmbylljen e muajit të luftës kundër kancerit, Mr. Sc. Dr. Afrim Muhaxhiri thekson se në ekipin e mjekëve që kanë ofruar këto shërbime ishin edhe Dr. Gëzim Lipoveci, Dr. Minire Zuna, Ass. Dr. Ramadan Sopa, Dr. Mimoza Hoxha Muhaxhiri, Dr. Ilir Beqiri dhe Dr. Thomas Sattler (i cili punoi gjatë tri ditëve të fundit) kanë punuar me orar të zgjatur për të përballuar fluksin e madh të pacientëve.

Muhaxhiri ka thënë se ky aktivitet duhet të vazhdojë me angazhimin e gjithë shoqërisë kosovare duke përfshirë këtu edhe Ministrinë e Shëndetësisë dhe ka kërkuar që mediat të ofrojnë më shumë hapsirë në ngritjen e vetëdijes tek gratë që të mos hezitojnë për tu kontrolluar në institucionet shëndetësore, sepse zbulimi i kancerit në fazen fillestare të zhvillimit është e mundur që të mjekohet tërësisht.