Nxënësit e drejtimit të Fizioterapisë në shkollën e mjekësisë Hysni Zajmi janë pajisur më një kabinet të ri përmes të cilit mësimet teorike mundë ti realizojnë praktikisht. Projekti është donacion nga Republika e Turqisë dhe kap vlerën financiare 32 mijë euro.
Në ceremoninë hapëse, që u organizua të mërkurën, Komandanti i Kryesisë së Këshillit Turk në Kosovë, kolonel Savash Yanar, tha se me këtë projekt janë plotësuar nevojat për mësimdhënie dhe mësimnxënie në këtë drejtim. Ai pos tjerash tha se, me fillimin e shfrytëzimit të kabinetit studentëve I është mundësuar që programet e ndryshme të mjekimit dhe rehabilitimit në raste të thyerjeve, çrregullimeve nervore, muskulore dhe atyre nyjore, lëndimeve sportive e tj, ti mësojnë me anën e masave aplikative.
“Kryesia e Këshillit Turk në Kosovë, në komunën e Gjakovës ka realizuar projekte, si ai në Spitalin Isa Grezda, QMF në Rogovë, rregullimi i rrugës në fshatin Cermjan dhe projekti në Shkollën e Mjekësisë. Projektet si këto do të vazhdojnë edhe më tutje me qëllim të fuqizimit të miqësisë sonë qindra vjeçare”, ka thënë Yanar
Ambasadori i Turqisë në Kosovë, Çağrı Sakar, I cili morri pjesë në këtë ceremoni tha se ky nuk ë është projekt i vetëm në Gjakovës, pasi ka pasur edhe projekte të tjera dhe ato do të vazhdojnë edhe në të ardhmen.
Ndërkaq, ministri i Arsimit, Ramë Likaj ka falënderuar Qeverinë turke jo vetëm për përkrahje për ndërtimin e paqes, por edhe atë në fushën e arsimit sikur rasti I ditës së sotme në këtë projekt të arsimit.
Kryetari i Komunës, Ardian Gjini, e ka vlerësuar këtë donacion si tejet të vlefshëm në funksion të përmirësimit të kualitetit të mësimdhënies dhe kushteve të mësimit për nxënësit e komunës tonë.
“Jemi shumë mirënjohës ndaj Republikës së Turqisë për këtë donacion i cili nuk është i vetmi në dy ose tri vitet e fundit” u shpreh ndër të tjera Kryetari Gjini.
Projekti i Kabinetit të Fizioterapisë përfshin furnizimin me pajisje në fushën e fizioterapisë, furnizimin me laptopë, projektorë, banka, karrige, dollape, rregullimin e instalimeve elektrike, ndriçimin e kabinetit dhe renovimin e klasës në përgjithësi.
Këto investime, sipas profesoreshës së fizioterapisë të kësaj shkolle, Besarta Nagavci, kanë qenë shumë të nevojshme dhe do të ndihmojnë në cilësinë e mësimit praktik në këtë shkollë..
