Mezo-soproanoja nga Gjakova, tashmë e njohur ndërkombëtarisht Flaka Goranci ka arritur një tjetër sukses të radhës në skenën ndërkombëtare të operës. Në mesin e shumë konkurrentëve nga e tërë bota, ajo është zgjedhur pjesë e operës “Le nozze di Figaro” të Moxartit. E më shumë se për këtë, suksesi i Flakës rritet për faktin se me këtë operë ajo do të përformojë në Teatrin Ndërkombëtar të Vjenës, njërin prej teatrove më të njohura të operës në botë dhe me një publik të përzgjedhur. Kjo shfaqje do të prezantohet nga një kastë këngëtaresh nga më të njohurit në botën e operës e sidomos nën dirigjimin e dirigjentit te famshëm botëror Nikolaus Harnoncourt, njërit prej njohësve kryesor të veprave te periudhës klasike. Prezenca e Flakës në këtë vepër gjigante botërore, llogaritet si një vlerësim i lartë për të dhe njëkohësisht mundësi fantastike për te provuar skenën ndërkombëtare, në të cilën kërkesat për të qenë pjesë e një produksioni të tillë janë te jashtëzakonshme. E kjo pjesëmarrje, është vlerësuar si arritje e madhe edhe nga vet Flaka. Ajo ka thënë se të përformosh në Teatrin Ndërkombëtar të Vjenës, të këndosh me dirigjentin Nikolaus Harnoncourt dhe një grup madhështor të këngëtarëve të njohur, është eksperiencë e veçantë dhe unike për të.
