Saturday, February 3, 2024
AktualeLajmeLajmet e shpejta

Ftohjet sezonale me simptoma gripi


Vazhdon përhapja e virusit që po shkakton probleme shëndetësore   tek një numër i madh i bashkëqytetarëve. Gripi stinor është një infeksion akut viral respirator i shkaktuar nga viruset e gripit stinor. Mjeket thonë se çdo grip stinor përhapet nga viruse të ndryshme të tij dhe prek njerëz të ndryshëm në bazë të aftësisë së trupit të tyre për të luftuar infeksionin. Edhe kjo fundjavë ka kaluar me numër në rritje të pacientëve që kërkojnë ndihmën mjekësore nga ftohjet sezonale gripoze.  Sipas drejtoreshes Violeta Xërxa Thaqi, vetëm të shtunën dhe të dielën  në Qendrën Kryesore të Mjekësisë Familjare nga ora 7 e mëngjesit e deri në mesnatë ka pasur mbi 850 pacientë që u janë drejtuar mantelbardhëve për të marrë ndihmën mjekësore për shkak të këtyre  ftohjeve sezonale që përcillen me  temperaturë të lartë,  Kollë, dhimbje fyti e koke, lodhje e tj. Ndërkaq shërbimi në njësinë urgjente për dy ditët e pushimit   ka ofruar shërbime mjekësore për  145 pacientë të tjerë.

Megjithë numrin e madh të të prekurve nga këto ftohje sezonale me simptoma gripi, nuk ka një vlerësim se tek ne ka grip. Në Institutin e Shëndetit Publik në Gjakovë, doktoresha Afërdita Bicurri tha se analizat e sëmundjes së gripit nuk punohen në Institutin e Gjakovës, por këto i bënë Qendra Kombëtare e Shëndetit Publik të Kosovës në Prishtinë.