Festa e ndërrimit të moteve si kudo në botë edhe në komunën e Gjakovës ka kaluar në atmosferë festive dhe me këmbimin e urimeve për një vit me shëndet të plot, punë, mirëqenie sociale, dashuri dhe paqe. Në këtë mbrëmje festive, për një çast i harruam problemet, vështirësitë dhe hallet e shumta me të cilat u ballafaquam gjatë vitit tashmë të vjetër 2014, për të festuar të gëzuar dhe të lumtur në natën e ndërrimit të moteve.
Disa qindra qytetarë kanë festuar nën qiell të hapur në ambientet festive të Namazgjahut, vend ku nuk ka pushuar kënga e vallja deri në orët e hershme të mëngjesit. Sipas informacioneve të para, nata e ndërrimit të moteve ka kaluar e qetë dhe pa incidentet theksuara.
Pjesë e atmosferës festive në Namazgjah ka qenë edhe kryetarja e komunës së Gjakovës Mimoza Kusari – Lila e shoqëruar nga bashkëpunëtorët e saj. Ajo ka festuar bashkë me qytetarët për disa orë, ndërsa më vonë ka vizituar disa nga institucionet më vitale të Gjakovës, si policinë, spitalin “Isa Grezda”, repartin e Emergjencës dhe atë të Gjinekologjisë, Brigadën e zjarrfikësve e të tjera.
Fëmiu i parë i lindur në Vitin e ri në komunën e Gjakovës është vajzë. Në repartin e Gjinekologjisë në Spitalin “Isa Grezda” janë kujdesur për lindje të shëndetshme dhe përgëzime për të gjitha nënat dhe të porsalindurit. Fëmija i parë për këtë vit është pagëzuar me emrin Esma . Mamia e këtij reparti, Sakibe Muhaxhiri thotë se fëmiu ka lindur pas orës 4 të mëngjesit të së enjtes me peshë mbi 3.600 kg dhe se gjendja e foshnjës së parë të këtij viti dhe nënës është e mirë. Repartin e lindjes e ka vizituar edhe kryetarja e komunës Mimoza Kusari Lila e cila ka uruar rritë të shëndetshme, lumturi dhe mirëqenie.
Nga ana tjetër, në brigadën e zjarrfikësve në Gjakovë, kanë bërë të ditur se nata e ndërrimit të moteve ka qenë jashtëzakonisht e qetë sa i përket zjarreve. Zjarrfikësit kanë intervenuar vetëm në dy raste të vogla, djegien e një ogjaku në qytet dhe të një pleme në njërin prej fshatrave të komunës sonë.
Përpos ditës së parë të vitit, 1 janari për komunën e Gjakovës simbolizon edhe ditën e parë të pavarësisë nga regjioni i Pejës, në aspektin e sigurisë, dhe krijimit regjionit në vete. Që nga dita e sotme, Gjakova është regjion i pavarur i policisë, gjë që nënkupton se do ta ketë Drejtorinë e vet të policisë, bashkë edhe me sektorët e njësitet përkatëse, si njësitin e krimeve ekonomike, njësitin anti narkotik, atë anti trafikim e të tjera. E në këtë drejtim, qytetarët e regjionit të Gjakovës, që përpos komunës sonë përfshinë edhe komunat e Rahovecit dhe Malishëvës, nga soti do t’i regjistrojnë automjetet e tyre me tabela të reja, konkretisht me numrin karakteristik 07, numër që simbolizon regjonin tonë. E në këtë temë, lajmi mirë i konfirmuar sot, është se ndërrimi i tabelave nga 03 në 07 do të jetë pa pagesë shtesë.
