Gjakova me telashet e vërshimeve
Shiu i pandërprerë, e gjatë natës edhe bora kanë mbuluar rrugët e Gjakovës. Borëpastrueset kanë pastruar rrugët nga bora, porse reshjet e mëdha të shiut kanë krijuar rrëke uji nëpër të gjitha rrugët, që janë bërë vështirë të kalueshme për këmbësorët. Lumenjtë janë në kuota maksimale. Për gjendjen e rënduar nëpër disa zona të komunës sot në rrjetet sociale janë botuar fotografi të shumta për shumë zona të komunës sonë.
Anipse bora ka pasur trashësi të vogël, shiu e ka rënduar situatën. Kompania e pastrimit të rrugëve në fshatra Berisha.com, e cila ka pastruar edhe rrugët e qytetit ka filluar pastrimin që nga orët e hershme të mëngjesi. Edhe punëtorët e KRM Çabrati janë angazhuar në hapjen e pusetave dhe orientimin e ujit në rrjetin e stërngarkuar të ujërave të zeza dhe atmosferike. Shumë bodrume të shtëpive janë mbushur me ujë. Edhe ekipet e KRU “Gjakova” janë duke e bërë të pamundurën që të sanojnë defektet e paraqitura sidomos në rrjetin e kanalizimit si pasojë e situatës së krijuar nga të reshurat e vazhdueshme, mirëpo, siç thonë këtu, duhet të merret parasysh se moti aktual vështirëson ndërhyrjet dhe tejkalon kompetencate kompanisë. “Gjithsesi ne do jemi 24/7 në ndihmë të konsumatorëve që t iu bëjmë zgjidhje aty ku është e nevojshme!”, thuhet në njoftimin e KRU Gjakova.
Kuvendi Komunal po monitoron këtë gjendje dhe ka konstatuar se pas reshjeve të dendura të shiut dhe borës gjatë mbrëmjes së kaluar e të cilat po vazhdojnë edhe gjatë ditës së sotme, është krijuar situatë e rënduar në disa zona të komunës. Të gjithë operatorët janë në teren dhe janë duke u munduar që të sanojnë problemet.
Kryetari i Komunës, Ardian Gjini pa për së afërmi shumicën e lokacioneve të cilat në mëngjesin e sotëm u raportuan si zona ku reshjet e pandërprera të shiut dhe borës sollën situata për ndërhyrje emergjente. Ekipet e drejtorisë për Mbrojtje dhe Shpëtim që janë në teren për sanimin e problemeve që janë shfaqur, raportojnë që në shumicën e rasteve në shtëpitë individuale problemi qëndron tek mos-ndarja e pusetave të kanalizimeve fekale nga ujërat atmosferik.
Deri më tani në qendrën e thirrjeve Emergjente 112, janë raportuar 25 raste në të cilat tashmë është ndërhyrë dhe situata është e menaxhueshme. “Derisa moti të përmirësohet, probleme të tilla do të mund të na përsëriten andaj bëjmë thirrje që rastet tuaja ti adresoni tek numri emergjent 112”, thuhet në njoftimin e komunës..
