Ndonëse grumbullimi i mbeturinave organike në komunën e Gjakovës llogaritet të jetë në nivel të kënaqshëm në krahasim me komunat tjera, kjo falë edhe angazhimit maksimal të kompanisë “Çabrati”, e njëjta gjë nuk mund të thuhet edhe për mbeturinat inerte, konkretisht dheun, betonin dhe mbeturinat nga ndërtimet e ndryshme. Në mungesë të dikujt që do të përkujdesej për këto lloj mbeturinash, anë e këndë Gjakovës janë krijuar deponi të egra me mbetje inerte, e të cilat përpos pamjes së shëmtuar po krijojnë edhe shumë rreziqe për qytetarët. E përderisa zyrtarët nga qeverisja e kaluar patën deklaruar se e vetmja që ata kanë mundur të bëjnë ka qenë pastrimi i këtyre ambienteve dhe gjobitja e atyre që hedhin mbeturina, zyrtarët e qeverisë së tanishme kanë premtuar të shkojnë përtej kësaj. Përpos pastrimit të vazhdueshëm dhe ndëshkimit për ata që kapen duke hedhur mbeturina, në drejtorinë komunale të Shërbimeve publike thonë se janë duke e shikuar mundësinë e gjetjes së një lokacioni të veçantë për këto mbeturina. Siç ka bërë të ditur drejtori i kësaj drejtorie Burim Meqa, në mbledhjen e fundit të bordit komunal është vendosur që të shikohen hapësirat e mundshme dhe përkohësisht të merret një vendim nga kjo drejtori, për gjetjen e këtij lokacioni.
