Friday, April 5, 2024
AktualeLajme

Gjakova shënon me aktivitete Ditën e Çlirimit, 14 Qershorin 1999

Gjakova ne feste1Komuna e Gjakovës të dielen  shënon 16 vjetorin e çlirimit. Është një ditë ku rikujtohet ndjenja e bukur e përjetimit të lirisë. Kjo është dita kur fuqizohet dashuria ndaj njëri tjetrit dhe ndjenjat humane dhe njerëzore për të gjithë banorët e Komunës sonë, veçmas të atyre të cilët ishin të rrezikuar nga skenarët e luftës së fundit. Me 14 Qershor,  kuptuam se si tejkalohet kufiri në mes jetës dhe vdekjes. Gjakova  bëri një luftë heroike, një luftë të drejtë, një luftë me shumë sakrifica, me shumë gjak të derdhur, me shumë humbje. Kurr s’do harrohet sakrifica e të rënëve për liri dhe qofshin përjetë të nderuar në panteonin e dëshmorëve dhe martirëve te këtij kombi kaq të vuajtur. Përmes uniformës së kushtrimit, përmes marshit të lirisë, përmes bijve dhe bijave të radhitur në UÇK, me 14 Qershor, krahas dhembjes dhe gëzimit, krahas ëndrrës dhe realitetit, ne përjetuam ndjenjën e shtetësisë dhe përjetuam idealin e gjeneratave të tëra. Është kjo një datë e rëndësishme kur me pietet kujtohet   sakrifica e dëshmorëve të Ushtrisë Çlirimtare të Kosovës, familjet e  dëshmorëve, veteranët dhe  invalidët e luftës për lirinë dhe pavarësinë e vendit.

Gjakova  përjetësisht i është mirënjohëse luftës së ‘Djemve të Asfaltit’, ‘Yjeve të Lirisë’,  Brigadës 137 Gjakova të UCK-së, gjithë pjesëtarëve të Ushtrisë Çlirimtare në Dukagjin e gjithë Kosovën, sakrificës së popullit që përjetoi krimet më të rënda por edhe ndihmës së vazhdueshme të NATOS, SHBA-së, dhe vendeve mike të BE-së.

Në vigjilje të ditës së çlirimit të Gjakovës veteranet e luftës së fundit, Shkëndije Hoda dhe Mimoza Shala, pjesëtare të brigadës ‘137 Gjakova të UÇK-së, kanë kujtuar 14 qershorin e para 16 viteve si një ditë të veçantë dhe historike të popullit të Gjakovës dhe njëkohësisht kanë kërkuar një mbështetje shumë më të madhe për dëshmorët dhe heronjtë.

Me rastin e 16 vjetorit të çlirimit të Gjakovës nesër zhvillohen aktivitete të shumta përkujtuese, kulturore e sportive të cilët nisin në mëngjes me vënien e kurorave me lule dhe homazhe në varrezat e dëshmorëve. Gjatë ditës së nesërme do të mbahet edhe një takim me krijuesit që jetojnë e veprojnë jashtë Gjakovës por që me aktivitetet kulturore kontribuojnë për afirmimin e qytetit. Atyre komuna do t iu ndajë mirënjohje. Në mbrëmje mbahet koncerti i madh festiv në qendër të qytetit.

Ja dhe agjenda e komunes për 14 Qershor 15

09:00 Homazhe – Lapidari “Shokët e Lirisë”, varrezat e dëshmorëve, varrezat e martirëve në Meje dhe Çabrat

10:00 Përurimi i rrugës “Halit Asllani”

11:00 Përurimi i rrjetit energjiitik Trakaniq-Novosellë

12:00 Përurimi i fushës së futbollit – Palestra Sportive “Shani Nushi”

13:00 Dita ndërkombëtare e dhurimit të gjakut – Transfuzioni i gjakut, Spitali Regjional

17:00 Ndarja e mirënjohjeve nga Komuna e Gjakovës për personalitetet e artit, kulturës dhe sportit

20:00 Koncert me rastin e Ditës së Çlirimit në Gjakovë