Gjakova skenë për filmin e Xhuvanit
Në Gjakovë ka kohë që grupi i xhirimeve shëtit nga një kënd në tjetrin duke xhiruar skena intersante filmi. Në rrethana të motit të ftohtë është duke u xhiruar një film artistik për luftën e Kosovës, për eksodin, shpërnguljen, dashurinë.. Ky është filmi më i ri i Gjergj Xhuvanit, i cili ,me 25 nëntor “13 nisi xhirimet. Bëhet fjalë për filmin artistik me metrazh të gjatë “Engjëjt janë larg”, mbështetur financiarisht nga QKK, bashkëprodhim Shqipëri-Itali. Siç mësojmë nga producenti i filmit, Dritan Huqi, xhirimet kanë nisur në Gjakovë, për të vijuar më tej në Tropojë dhe në Itali.
Filmi me regji dhe skenar të Xhuvanit përqendrohet te drama kosovare e kjo ka bërë që në kastin e aktorëve të përfshihen edhe artistë nga Kosova. Por do të ketë edhe nga Italia. Kështu, në rolet kryesore interpretojnë aktori italian Rinaldo Rocco dhe Teuta Krasniqi. Gjithashtu pjesë e kastit është Fatmir Spahiu nga Kosova dhe shënohet pjesëmarrja e aktorit shqiptar Ndriçim Xhepa, me sa duket një nga të preferuarit e Xhuvanit. Stafi teknik vjen nga Italia.
Ashtu si çdo film tjetër shqiptar, që nga momenti i miratimit në QKK, deri në fillimin e xhirimeve, duhet të kalojë një kalvar të gjatë për gjetjen e bashkëprodhuesve, financimeve etj., edhe filmi i Xhuvanit nuk i ka shpëtuar kësaj “procedure”.
Filmi i Xhuvanit është i katërti me metrazh të gjatë, me mbështetjen financiare të QKK-së, që ka nisur xhirimet gjatë këtij viti .
Ngjarja e këtij filmi nisë me fillimin e bombardimeve të NATO-s mbi caqet serbe.
Regjisori i njohur shqiptar Gjergj Xhuvani, tha se ngjarja e këtij filmi është e vendosur në një jetimore të braktisur të fëmijëve të cilët kishin ngelur aty vetëm me mësuesen e tyre dhe udhëheqësin shpirtëror. Sipas tij në këtë realizim filmik përmes fatit të fëmijëve, ai tenton të sjellë përgjigje në shumë pyetje, kur është fjala tek rikthimi i vështirë në jetën normale i të gjithë atyre të cilët kanë përjetuar katrahurat e luftës.
“Ka qenë një dëshirë e kahershme të pasqyroja dhimbjen, sakrificën e popullit të Kosovës. Në fakt filmi zhvillohet në ditët e bombardimeve të NATO-s. Filmi, për shkak të mundësive tona por edhe për shkak të konceptit tim që kam për trajtimin e ngjarjeve nuk është një film aksion. Filmi merr përsipër të shpjegoi dhimbjen, emocionet, dramat që krijon tragjedia e luftës. Për ta bërë filmin më sensibël dhe më të ndjeshëm historia dhe përjetimi I luftës përballohet nga 12 fëmijë të vegjël. Është bota dhe jeta e tyre, bota e pesë vajzave dhe 7 djemve që janë të një jetimore por edhe të një kolegji. Në këtë situatë të braktisur fëmijët janë të detyruar të mbijetojnë edhe në rrethanat e luftës. Sigurisht nuk jetojnë të vetmuar, por jetojnë në atmosferën ku bëhen dëshmitar të krimeve që bëhen , të tragjedive që ndodhin por, edhe dëshmitar të forcës dhe vitalitetit njerëzor të këtij populli që gjen forcën për të mbijetuar dhe për ta kthyer gjithë dhimbjen në një dashuri”, tha regjisori Xhuvani.
Në rolin kryesor të mashkullit paraqitët aktori i njohur italian Rinaldo Rocco ndërkaq për rolin kryesor të femrës është përzgjedhur aktorja e njohur kosovare, Teuta Krasniqi.
“Ky është roli më sfidues që kam pasur deri me tash . Fati I dy njerëzve dhe disa fëmijëve. Nuk është filmi lufta, por ngjarja ndodhë në luftë. Si subjekt kryesor është fati I këtyre dy njerëzve. Unë mendoj se kjo është një nismë e një vazhdimësie shumë më të ndritur në aspektin e filmave në karrierën time, sado që unë kam karrierë në teatër e film, ky është film në kuptimin e plotë të fjalës. Tash jam duke e jetësuar ëndrrën time. Është një personazh e një vajze të pafat e që jeta e ka sfiduar me shumë vështirësi. Në momentin më të vështirë, gjatë luftës në Kosovë, ajo kthehet në Kosovë dhe thjesht në një farë mënyre e gjen paqen me vetveten, pikërisht gjatë periudhës së luftës kur vjen në jetimore kur takohet me priftin dhe fëmijët” tha Krasniqi.
Filmi artistik me titull pune “Engjëjt”, pritet që të jetë gati në shtator të vitit të ardhshëm. Sa i përket vendit se ku do të shfaqet premiera, regjisori Xhuvani ka thënë se kjo ende nuk është përcaktuar, ndonëse sipas tij, është zakon që kjo të bëhet në vendin ku është xhiruar filmi.
