Të mërkurën në Gjakovë zhvillohet ndeshja ndërkombëtare në hendboll në mes të përfaqësueses së Kosovës dhe asaj të Bosnje Hercegovinës e vlefshme për kualifikimet e Kampionatit botëror Franca 2017. Edhe sot e nesër, hendbollistët kosovar do ti zhvillojnë përgatitjet në pallatin e sporteve Shani Nushi ku I kishin nisur ato edhe para festes së Vitit të ri, për të qenë të gatshëm në përballjen e vështirë me Bosnjën, skuadrën e cila nga dy takimet me 6 dhe 9 janar pretendon fitore. Mirëpo hendbollistët e prirë nga kapiteni Ylber Mjeku dhe kryetrajneri Taib Kabashi e trajneri Nexhdet Dobroshi nuk do të dorëzohen lehtë. Ata shpresojnë në angazhimin e madh dhe mbështetjen e publikut gjakovarë që asnjëherë nuk ka munguar për përfaqësuesen e Kosovës në hendboll.
Ndeshja Kosova-Bosnja Hercegovina zhvillohet të mërkurën prej orës 19 e 15 minuta në pallatin e ngrohtë të sporteve Shani Nushi.
Ndryshe Kosova në kualifikimet për Franca 2017, ka një orar të vështirë. Më 9 janar, Kosova në Tuzëll luan me Bosnjen. Më 13 janar, Kosova do të luajë në udhëtim ndaj Lituanisë, kurse ndeshjen e fundit në kuadër të këtij cikli e ka më 17 janar në Gjakovë kundër Sllovakisë.
Kosova në dy ndeshjet e para ka pësuar disfatë, kundër Lituanisë në shtëpi me shifrat 30:26 dhe kundër Sllovakisë në udhëtim me shifrat 38:20. Këto ndeshje janë luajtur në nëntor.
Kosova është e vetmja në grupin e parë pa pikë të fituara. Lituania dhe Bosnja kanë nga tri pikë, kurse Sllovakia i ka dy pikë.
