KB Vëllaznimi me trepikshin e Zekiqit në “Play-off”

Në një lojë dramatike deri në sekondat e fundit, dhe me trepikshin e Burim Zekiqit,   Vëllaznimi ka shënuar fitoren më të rëndësishme në këtë kampionat. Kuqezinjtë kanë mundur Ponte Prizrenin 82:79 (21:16, 25:22, 20:23, 16:18), në javën e 27-të të Prince Caffe Superligës. Kjo fitore i siguron kuqezinjve vendin e gjashtë, që dërgon në “Play-off”.

Takimi ka qenë shumë interesant, ndërsa të dy skuadrat luftuan nga fillimi deri në fund, pasi sfida ishte shumë e rëndësishme. Vendasit për një nuancë ishin më të mirë në pjesën e parë, që e fituan 46:38.

Në periudhën e tretë vendasit kishin epërsi deri në 22 pikë, 62:40, por më pas mysafirët u rikthyen për 66:61. Dhjetë minutat e fundit ishin shumë interesant me mysafirët që bëjnë përmbysjen e madhe për të kaluar në epërsi 77:79, por vendimtar ishte Burim Zekiqi me treshe për 80:79, ndërsa rezultati përfundimtar ishte 82:79.

Te Vëllaznimi u dalluan Damonte Dodd me 15 pikë, 17 kërcime e pesë asistime dhe Jordan Harris me 24 pikë, katër kërcime dhe gjashtë asistime. Vëllaznimi tani ka nëntë fitore e 18 humbje. Kuqezinjtë i kanë mundur katër herë prizrenasit në këtë edicion.