Duket se kriza në Klubin e futbollit Vëllaznimi po mbaron. Nën organizimin e Drejtorisë për Kulturë rini dhe sporte të Gjakovës sot u mbajt Kuvendi i jashtëzakonshëm zgjedhor ku u zgjodh kryetari ri i klubit, Shkelzen Gashi, bashkëvendasi yni që jeton e punon në Gjermani.
Ai sëbashku me Muhamet Aliun kanë vendosur që ta mbështesin financiarisht Vëllaznimin për ta tejkaluar situaten e rëndë financiare dhe për të synuar, me përgatitje intensive edhe arenën ndërkombëtare. Në kryesinë e klubit janë: Muhamet Aliu dhe Artan Muhaxheri, nënkryetar, pastaj anëtarë Meriton Ferizi, Luan Vokshi, Kreshnik Komoni, Albin Sahatqija, Bashkim radogoshi dhe Valon Gexha.
Kryetari sapozgjedhur Shkelzen Gashi shpalosi synimet e skuadrës “kuq e zi” e cila sipas tij, do të ketë një fizionomi të re, të bëhet më tërheqëse për donatorët e ri dhe e gatshme për sfidat evropiane.”Vëllaznimi është një klub me emër të madh prandaj synojmë t”ia kthejmë namin” ka thënë Gashi, ndërsa edhe anëtarët tjerë të kryesisë së re u zotuan se do të punojnë bashkërisht për një funksionim të suksesshëm të klubit të futbollit Vëllaznimi. Drejtori i Kulturës, rinisë dhe sporteve Meriton Ferizi, në emër të komunës ka falënderuar Gashin dhe Aliun që në momentet më të vështira i janë afruar klubit për mbështetje.
