Pas ngjarjeve më të reja të futbollin e Kosovës, përkatësisht rrjedhës aktuale të garave në Super Ligën e Kosovës, Kryesia e K.F.”VËLLAZNIMI” ka bërë një reagim publik në të cilin pos tjerash thuhet se i tërë ky edicion i garave është përshkua me një rrjedhë mjaft të çuditshme, me mjaft parregullsi apo tendenca për parregullsi.
“ Kjo situatë është shumë më e theksuar në stinorin pranveror, ndërsa ka kulmuar javëve të fundit. Në shumicën e këtyre ngjarjeve (vendimeve) K.F.”Vëllaznimi” ka qenë i atakuar padrejtësisht dhe ka qenë viktimë e lloj-lloj marifeteve. Nuk kemi reaguar asnjë herë, sepse kishim vendosur të heshtim, të kryejmë detyrat tona ashtu siç mundemi dhe dimë, të bindur se herdo kur, e vërteta do të dali në shesh dhe me shpresën se e tërë kjo nuk është e qëllimshme dhe nuk është e orientuar kundër klubit tonë. Fatkeqësisht u bindëm se kjo e fundit nuk qëndron dhe se ekziston një “forcë” (qendër) që vazhdimisht është duke punuar me çdo kusht kundër klubit tonë, e që për fat të keq ajo po has në përkrahje edhe të disa organeve të FFK-s!
Më tutje theksohet se që nga fillimi i stinorit pranveror, gjyqtarët, thuajse unanimisht janë orientuar kundër Klubit tonë, në ç’drejtim prijnë gjyqtarët nga Mitrovica që kanë ra nën ndikimin e akuzave të padrejta të zyrtarëve të K.F.”Trepça’89”. Pse këta zyrtar të klubit mitrovicas janë kundër nesh, e ka të qartë i gjithë opinioni futbolldashës i Kosovës (pse, në edicionin e kaluar, nuk kemi pranuar të futemi në trukime në favor të tyre), por kemi shpresuar se këtë e kanë të qartë edhe zyrtarët e FFK-s, dhe nuk do të bien në kurthin tyre, por nuk doli ashtu.
Pasi përmendin vetëm disa të dhëna që dëshmojnë për kampanjën e pa drejtë kundër Klubit, në kumtesë thuhet se :
Nëse vazhdohet të veprohet kështu me këmbëngulje kundër Klubit tonë, bota nuk do të përmbyset, por do të përmbyset futbolli kosovar. Nuk do të kishim dëshirë që të na detyroni të tërhiqemi nga këto gara të padrejta. Por, nëse na detyroni, nuk do të hezitojmë as nga ky veprim. Sepse nuk është normale të garosh dhe të shpenzosh mjete në një garë ku epilogu dihet shumë më herët!, thuhet në reagimin publik të KF Vëllaznimi.
