Saturday, February 3, 2024
Kulturë

“Kolonel Zogu” thyen qetësinë në skenën e Teatrit të Gjakovës

teatriPas një pauze të gjatë, Teatri Profesionist i Gjakovës vjen para adhuruesve  të artit skenik me premierën e parë për këtë vit. Bëhet fjalë për komedinë “Kolonel Shpendi” nga autori bullgar Kristo Bojkov e me regji të Erson Zymberit.

Sipas Edi Kastratit, drejtor i teatrit, për realizimin e këtij projekti kanë ndihmuar financiarisht Ministria për kulturë, rini e sporti si dhe komuna e Gjakovës, ndërsa një ndihmë simbolike e ka dhënë edhe Ambasada bullgare në Kosovë dhe Universiteti Universum. Nga ana tjetër, regjisori Zymberi ka thënë se për të është kënaqësi e madhe të punojë në Gjakovë dhe me trupën e teatrit të Gjakovës, sepse, sipas tij, kjo është njëra ndër trupat më të mira në trojet shqiptare.

Në komedinë “Kolonel Shpendi”, që pritet të shfaqet në gjysmë të muajit qershor do të jenë të angazhuar aktorët Bujar Ahmeti, Myrvete Kurtishi, Ylber Bardhi, Altina Kusari, Edmond Hafizademi, Ylber Mehmeti dhe Valon Pallaska e të tjerë. Në këtë shfaqje për skenografi do të përkujdeset Petrit Bakalli kurse për kostume Valmira Rrahmani. Muzikën e ka zgjedhur Ard Islami.