Komuna shtron Iftarin tradicional për Ramazan

Komuna e Gjakovës dhe kryetari Pal Lekaj,  për nder të muajit të madhërishëm të Ramazanit,  të shtunën mbrëma shtroi iftarin  tradicional në nderim të drejtuesve dhe besimtarëve, posaçërisht atyre agjërues dhe me këtë rast sëbashku me Kryetarin e Këshillit të Bashkësisë Islame të Gjakovës dhanë mesazhin e paqes dhe të dashurisë për njëri tjetrin duke lavdëruar tolerancën ndërfetare në komunën e Gjakovës.

“Muaji I shenjtë I Ramazanit ngërthen në vete paqen dhe dashurinë mes njerëzve  dhe është muaji kur besimtarët islam I nënshtrohen Zotit”, tha Ahmet Hoxha, kryetar I BI të Gjakovës I cili falenderojë kryetarin Lekaj për këtë iftar.

Hoxha tha se bashkimi jo vetëm fizik por edhe shpirtëror është virtyt yni ndërsa ka kritikuar një grup njerëzish që me paraqitjet e tyre destruktive  publike po tentojnë të njollosin figura të shquara të kombit. “Ata që flasin ashtu janë mendje të mykura” tha Hoxha.

Pasi përgëzoi besimtarët islam për Muajin e shenjtë të Ramazanit, për tolerancën ndërfetare  foli kryetari komunës Pal Lekaj I cili tha se:”Nuk ka më mirë që në një vend siç është ky sonte, pjesëtarë të feve të ndryshme rrinë bashkë. Ne jemi të feve dhe tarikateve të ndryshme por mbi të gjitha jemi shqiptarë” tha Lekaj duke përçuar mesazhin e dashurisë dhe paqes mes qytetarëve të Gjakovës.

Iftari sipas riteve tradicionale u  shtrua në restaurantin “Roma”.