Kryetarja e Kuvendit, Lindita Nikolla, më 11 mars zhvilloi një vizitë në Gjakovë. Gjatë kësaj vizite Kryetarja Nikolla shoqërohej nga Ambasadori i Shqipërisë në Kosovë, Qemal Minxhozi, dhe drejtuesi i zyrës për koordinimin e marrëdhënieve dypalëshe mes Shqipërisë dhe Kosovës, Gentian Sala.
Në Komunën e Gjakovës, Kryetarja Nikolla u prit nga Kryetari, Ardian Gjini, i cili e njohu me përpjekjet për zhvillimin e Komunës dhe mirëqenien e qytetarëve si edhe me bashkëpunimin e ngushtë me bashkitë e Kavajës e Sarandës, me të cilat Komuna e Gjakovës është e binjakëzuar, si edhe me bashkitë e Shkodrës, Lezhës, Kukësit,Tropojës etj.
Kryetarja Nikolla e vlerësoi mbresëlënës vizionin, menaxhimin dhe përkushtimin e Kryetarit Gjini për zhvillimin, mirëqenien dhe të ardhmen e komunës, qytetit dhe qytetarëve dhe nënvizoi se Kuvendi i Shqipërisë do të nxisë e mbështesë bashkëpunimin midis njësive të qeverisjes vendore të të dy vendeve në të mirë të qytetarëve të Shqipërisë dhe Kosovës.
Dy marrëveshjet e ratifikuara më 10 mars nga Kuvendi, për sigurimet shoqërore dhe lehtësimin e lëvizjes e qëndrimit të banorëve të zonave kufitare, do të afrojnë më shumë qytetarët e të dy vendeve.
Znj. Nikolla e falenderoi Kryetarin Gjini edhe për ndihmën e dhënë qytetarëve shqiptarë të zonave kufitare gjatë pandemisë.
Një takim të përzemërt Kryetarja e Kuvendit, Lindita Nikolla, zhvilloi edhe me anëtaret e Shoqatës “Thirrja e Nënave”, në Gjakovë.
Kryetarja e Shoqatës, Nysrete Kumnova, e njohu Kryetaren Nikolla me punën e anëtareve të Shoqatës, të cilat vazhdojnë të kërkojnë burrat dhe bijtë e humbur gjatë Luftës në Kosovë në vitet 1998-1999.
“Është e dhimbshme dhe prekëse të shohësh fotot e burrave e bijve të Gjakovës dhe Kosovës, të cilëve nuk u dihet fati. Ky muze flet më shumë se një mijë fjalë!
Kjo plagë e hapur, e pashëruar, është një thirrje për paqe, në këtë kohë të trazuar, kur rreziku i luftës është një alarm për popujt, shtetet dhe njerëzit paqedashës.
Ju lutem, më konsideroni edhe mua si anëtaren më të re të Shoqatës suaj.”, u shpreh znj. Nikolla.
Kryetares së Shoqatës, zonjës me shpirt të plagosur, por të fortë e të paepur, Nysrete Kumnova, e cila gjatë luftës ka të humbur pesë anëtarë të familjes dhe djalin e saj 20 vjeçar, si edhe anëtareve të Shoqatës, Kryetarja Nikolla u shprehu solidaritetin e saj dhe të Kuvendit të Shqipërisë në misionin e tyre njerëzor dhe i ftoi për një vizitë në Kuvend.