Beteja e Koshares paraqet një inspirim të jashtëzakonshëm për të gjithë ne që të punojmë edhe më shumë për zhvillimin dhe përparimin e vendit tonë, u tha në Manifestimin e mbajtur të enjten në Koshare me rastin 16 vjetorit të kësaj beteje.
‘Kjo betejë ishte njëra ndër fitoret më të rëndësishme të luftës së Ushtrisë Çlirimtare të Kosovës, dhe padyshim shënon momentin e kthesës vendimtare të kësaj lufte, sepse atë ditë forcat pushtuese kuptuan se luftën e kishin humbur, ndërsa luftëtarët tanë e panë të jetësohej me sukses disiplina dhe përgatitja e prijësve të kësaj beteje në njërën anë, me guximin dhe sakrificën e ushtarëve që morën pjesë në fitore, në anën tjetër. Heqja me luftë e kufirit mes Kosovës dhe Shqipërisë më 9 prill të vitit ’99, nga Brigada 138 “Agim Ramadani” shënon njërën prej fitoreve më domethënëse të luftës së Ushtrisë Çlirimtare të Kosovës. Në aspektin luftarak, Beteja e Koshares përbën fillimin e luftës frontale për çlirimin e Kosovës , tha kryeministri i Kosoves Isa Mustafa.
Në këtë betejë ranë heroikisht 116 dëshmorë në mesin e të cilëve edhe komandantët Sali Çeku, Agim Ramadani, Abaz Thaqi, Shefqet Mustafa, e të tjerë si dhe u plagosën rëndë e lehtë 350 luftëtarë.
Në manifestimin sotëm kanë folë edhe njëri nga komandantët e betejës së Kosharës Hysen Berisha dhe në emër të familjarëve ka folur, gruaja e komandantit Agim Ramadani, Shukria e cila në fjalën e saj është ndalur tek gjendja në të cilën momentalisht gjendet kompleksi memorial në Koshare.
Projekti për ndërtimin e Kompleksit Memorial përfshin një shumë prej 4 milionë eurosh. Por, deri më tani janë ndarë vetëm 600 mijë, ndërsa shuma vjetore për përfundimin e këtij projekti, që Qeveria kishte planifikuar është rreth 200 mijë euro.
Në manifestimin e sotem u shfaq edhe një program kulturo artistik.