Libra të rinj: “IMAZHE JETE”, MASAR KUPA

Shkruan : Hajrulla Hana

Pas botimit të përmbledhjes poetike me titull “MOTIV ZJARRI” (2007), në dhjetorin e 2018-tës, u botua edhe përmbledhja e dytë e radhës me titull “IMAZHE JETE” (2018). Sipas të dhënave të  këtij krijuesi dhe për njoftim të adhuruesve të fjalës së shkruar, autori Masar Kupa ka edhe shtatë përmbledhje poetike dhe një roman në dorëshkrim. Libri me poezi “MOTIV ZJARRI” botuar para më shumë se një dekade, përbëhej nga katër cikle (pjesë) poezish: “Motiv zjarri”, “Siluetë e hijezuar”, “Rrëfime”, “Ti, e pathëna më e madhe” e të gjitha këto (83) poezi të katër pjesëve përshkruanin motive të ndryshme nga fëmijëria, adoleshenca, motet rinore,  e deri te pjekuria e autorit. Kjo vepër poetike u përgatit nga recensenti, (poet dhe prozator) Agim Gjakova, emër i njohur për lexuesin.

Poeti piktor Masar Kupa (1943), jeton dhe krijon në Gjakovë dhe krahas poezisë është edhe piktor, ku deri më tani ka pasur 14 ekspozita  të pavarura. Por ka marrë pjesë në 28 ekspozita të tjera kolektive…ku për punimet e tij janë shprehur për të mirë edhe kritikët dhe njohësit e artit pamor. Kështu, vitin e kaluar përmbushi 60 – vjetorin e krijimtarisë në artin pamor dhe në artin letrar. Është anëtar dhe njeri ndër themeluesit e Klubit të Artit Pamor, si dhe klubit letrar “Gjon Nikollë Kazazi” të Gjakovës. Njëherit është bashkëthemelues i Mitingut tradicional të Poezisë që mbahet në Gjakovë, nga viti (1964), e ku marrin e kanë marrë pjesë emra të njohur krijuesish nga mbarë trevat shqiptare…(që tash shumë nga ata janë të ndjerë,si: B.Bokshi, E.Gjergjeku, D.Mehmeti, A.Podrimja, etj.,me të cilët Masar Kupa ka lexuar vargjet e veta.

Ky krijues vazhdon prapë rrugëtimin e tij poetik, por tash me krijuesit e rinj, pa e lënë anash pikturën ecila shoqërohet me vargje të bukura,  me një skofi që lexohen me vëmendje nga dashamirët e artit krijues poetik.

Një mozaik lirikash, vitin që kaloi, Masar Kupa solli me përmbledhjen poetike e cila titullohet “Imazhe jete”. Përmbledhja fillon me një parathënie brilante të redaktores letrare e gjuhësore, mr. prof. Migena Arllati, botim ky i klubit letrar “Gjon Nikollë Kazazi”.

Është ky “një vëllim me krijesa të bukura poetike, me lirika të brishta dhe vargje të cilat tregojnë se si krijuesi i tyre është ‘kurthuar’ në të bukurën e jetës, plot frymë dhe afsh. Me refleksione të tilla, poeti Masar Kupa, kësaj here, në vend të telajos së pikturës ka penelizuar në fletën e bardhë të shkrimit poetik, duke renditur bukur një nga një si rruazat në varg, dhjetëra poezi të këndshme, emocionuese, frymëzuese. Duke thurrur një mozaik të magjishëm, ai vendos shpirtin e tij në letër, duke shtruar në të një sërë përvojash dhe konceptimesh subjektive mbi jetën, dashurinë, të bukurën, artin…” 

Vëllimi poetik “Imazhe jete” ndahet në shtatë (7) cikle – kapituj: I – “Perlat e vendlidjes”(19 poezi), II – “Sime ëme!”(9 poezi), III – “Imazh’99”(10 poezi), IV – “Galeri emblematike shpirti”(26 poezi), V – “Të bëra emër, në varg poezie” (11 poezi), VI – “Jetëlumi im!”(12 poezi), VII – “Nënqesh si diell agmie”(16 poezi). Janë këto pjesë-kapituj që sajojnë këtë vepër të poetit piktor Masar Kupa.

*Perlat e vendlindjes: E kush nuk thuri vargje për vendlindjen?! Këtë e bënë edhe krijuesit (poetë, prozatorë) romantikë, realistë dhe bashkëkohorë. Prandaj janë radhë e radhë krijuesish, poashtu edhe Masar Kupa. Ky vendlindjen e ka bërë qenie me oborret, vreshtat…ndërsa dallohen emërtimet, Çabrati,Krena, Ura e Taliqit etj. “N’ty moj u linda/ dhe po, në një mëhallë lufte,/ edhe të dy mizorisht/ s’bashku tmerr mbijetuam”…nga YLBERTARE, GJAKOVË! Kështu, në poezitë e tjera kemi vendet pikante ku kaloi fëmijërinë dhe po plaket.

*Sime ëme!:Dihet që njerëzit më të dashur për fëmijët janë prindërit, por nëna është identiteti familjar. “O nënë,/ Je dashuri mbi dashuritë!”…nga poezia”O NËNË, JE…ose “Ajo!!/ Në mangësinë e madhe/ Atë, që s’e kam,/ Ajo, që më la/ n’jetimoren jetë/ të vazhdimësisë…nga KUJTIMI PËR TIME ËMË! Portreti i saj e shoqëron kudo; kjo përshkruhet edhe në poezitë tjera të këtij kapitulli….(shkrimi i plotë në revisten Gjakovapress Nr. 124)