67 maturantët më të suksesshëm gjatë tyri viteve të shkuara shkollore të Gjimnazit Hajdar Dushi janë nderuar me mirënjohje për arritjet në procesin mësimor. Ceremonia e ndarjes së mirënjohjeve për nxënës të dalluar sipas drejtorit Bedri Cahani është organizuar për të vlerësuar kontributin e tyre të madh që kanë dhënë në betejën për dije gjatë shkollimit në gjimnaz. Me këto rezultate gjimnazit i është shtuar krenaria e bashkë me te edhe për mësimdhënësit dhe prindërit.
Sipas Cahanit kjo shkollë e re dhe moderne për një kohë të shkurtër ka bërë hapa të mëdhenj në ngritjen e cilësisë së mësimdhënies dhe mësimnxënies, ka zvogëluar numrin e mungesave, ka ngritur disiplinën dhe ka radhitur sukseset në shumë gara të dijes si dhe në veprimtaritë kulturore e artistike.
Fituesit e mirënjohjeve I ka përgëzuar edhe drejtoresha e arsimit Silvana Haxhikadrija e cila e ka vlerësuar këtë organizim që nxit nxënësit për suksese sa më të mëdha e që janë reflektuar edhe në testin e maturës me një shkallë të lartë kalueshmërie 98%.
Krahas mësimeve në këtë shkollë kujdes meritor i kushtohet edhe ruajtjes, pastërtisë dhe gjelbërimit të ambientit. Në garën për lulet më të bukura kanë triumfuar klasat: e dymbëdhjeta -11, e
njëmbëdhjeta 10 dhe e dhjeta-8 , të cilave u dhanë mirënjohje të veçanta.
Ceremonia e sotme në gjimnazin Hajdar Dushi u përmbyll me një program artistik të vet nxënësve të talentuar dhe me moton se shkollën e bëjnë të bukur: Nxënësit, Librat dhe Lulet.
