Mazllom Mejzini kujtohet me veprimtari të shumta
Krijuesi, këngëtari dhe instrumentisti i shquar i muzikës shqipe Mazllom Mejzini sot kujtohet në 10 vjetorin e vdekjes së tij me shumë veprimtari kulturore.
Me organizim të Drejtorisë komunale për Kulture, Rini dhe Sport, sot në Gjakovë bëhet promovimi i monografisë me titull “Mazllom Mejzini, Jeta, vepra dhe roli i tij në traditën muzikore gjakovare” të autorit Behar Arllati. Për vlerat dhe brendinë e kësaj monografie pritet të flasin recensenti akademik Pajazit Nushi, pastaj sekretari i shoqatës së intelektualëve “Jakova” Xhevat Koshi, e të tjerë.
Në qendër të vëmendjes së shënimit të përvjetorit të 10 të vdekjes së krijuesit muzikor Mazllom Mejzinit është koncerti festiv kushtuar këtij kolosi të muzikës gjakovare dhe mbarë shqiptare. Në këtë koncert përmes këngës do të shpaloset një pjesë e krijimtarisë së tij.
Meriton Ferizi, drejtor i kulturës dhe Edi Furra solist janë të bindur se koncerti i sontëm do të mbahet mend gjatë për faktin se është i gërshetuar me shumë pika që paraqesin figurën e ndritshme të krijuesit Mazllom Mejzini.
“ Ne do ta prezantojmë një pjesë të krijimtarisë së Mazllom Mejzinit I cili me të drejtë konsiderohet si një prej muzikantëve më të kompletuar gjakovarë, duke qenë se ishte njëkohësisht kompozitor, këngëtar dhe instrumentist në mandolinë dhe mandol’theksoi Ferizi.
Ndërkaq këngëtari Edi Fura tha se në repertorin e grupit muzikor ‘Lirikët’ këngët e baces Xom kanë zënë vendin e merituar dhe ato këndohen me ëndje.
Të themi se koncerti mbahet sonte prej orës 19 në Pallatin e Kulturës “Asim Vokshi” në Gjakovë. Me këtë rast këngët e Xom Mejzinit, do ti performojnë “live” këngëtarë dhe muzikantë të spikatur të muzikës së pastër shqipe, si doajeni i këngës qytetare Ismet Peja, pastaj Zenel Doli, dueti i njohur nga Elbasani Vëllazërit Zena, Edi Furra, Ramadan Krasniqi- Dani, Festina Mejzini, Linda Hakaj, Melita Bytyqi Cana, e të tjerë, të përcjellë nga orkestri “Lirikët”. Në këtë koncert, figurën e të madhit Mazllom Mejzini vijnë ta nderojnë personalitete të artit nga të gjitha trevat shqiptare
