Seanca e parë e Kuvendit të Komunës së Gjakovës për vitin 2014, me propozimin e kryetares së Komunës, Mimoza Kusari Lila, ka nisur me një minutë heshtje në nderim të presidentit historik Ibrahim Rugova, në përvjetorin e tetë të vdekjes.
“Puna dhe vepra e presidentit legjendar Ibrahim Rugova, të na shërbejë si motiv për punën tonë” është shprehur kryetarja Mimoza Kusari Lila në nderimin e bërë arkitektit të pavarësisë së Kosovës. Kryetarja e Komunës, ka shprehur përkushtimin e saj për këtë vit që të punohet bashkarisht për të mirën e Gjakovës, duke përfshirë në këtë kontest edhe dialogimin politik, ndërkaq, për mospërfaqësimin e minoriteteve në Kuvendin e Komunës, kryetarja Mimoza Kusari Lila ka thënë se “është sfidë për ne që të angazhohemi fuqishëm për komunitetet dhe të mendojmë për ta si pjesë e jona”.
Më pas, këshilltarja Rina Domi ka dhënë betimin si anëtare e re e Kuvendit të Komunës, e cila zë vendin e kryetares së Komunës, Mimoza Kusari Lila.
Pas miratimit të procesverbalit, më pas me vota të fshehta është bërë zgjedhja e kryesuesit të Kuvendit të Komunës ku Luan Gola, nga subjekti politik LDK me 18 vota pro tij është shpallur kryesues, përkundrejt kundërkandidatit Dervish Tahiri nga subjekti politik AAK-së, që ka marrur 16 vota, ndërkohë që një votë ka qenë e pavlefshme. Menjëherë është bërë edhe zgjedhja e kryetarëve (shefave) të grupeve të subjekteve politike pjesëmarrëse në Kuvendin e Komunës, ku me propozimet e subjekteve të tyre kryetar janë zgjedhur Gjylgjyzare Kerragjia Xharavina (AKR), Saranda Hyseni (AAK), Arben Rogova (PDK), Ilhami Shala (LDK), Anton Shala (PSHDK) dhe Arbërie Nagavci (Vetëvendosje).
Kuvendi i Komunës së Gjakovës punimet e sencës së parë për këtë vit i ka vazhduar me themelimin e Komiteti për Politikë dhe Financa, Komiteti për Komunitete, Komisioni për plotësimin dhe ndryshimin e Statutit të Komunës së Gjakovës, Komitetit për Arsim, Komiteti për Zhvillim Ekonomik, si dhe Komiteti për Shëndetësi në të cilë si pikë e rendit të ditës ka hyrë në këtë seancë ku dhe është miratuar, si dhe Komisionit për Identifikimin dhe Dhënien në Shfrytëzim të Banesave të Banimit Social. Në saje të vendimeve dhe propozime të subjekteve politike, Komiteti për Politikë dhe Financa përbëhet prej pesëmbëdhjetë këshilltarëve, sipas kësaj përbërje numerike dhe emërore: AKR ka katër anëtarë, të cilët janë Masar Lluka, Sevdije Haxhibeqiri, Hasan Krasniqi dhe Gjylgjyzare Kerragjia Xharavina. Subjekti politik AAK ka tre anëtarë në përbërje Saranda Hyseni, Pjetër Ndou dhe Dervish Tahiri. Subjekti politik PDK ka dy anëtarë, Arben Rogova dhe Fëllanza Rexhepi, aq sa kanë dhe LDK-ja në përbërje Luan Gola dhe Ilhami Shala. Ndërkaq, subjektet politike me përfaqësim më të ulët numerik, PSHDK-ja, Vetëvendosje, Partia e Drejtësisë dhe Partia Demokristiane e Kosovës për Integrim kanë nga një anëtarë, të cilët janë Janez Frrokaj, Arbërie Nagavaci, Bahri Bokshi dhe Prend Gjinaj. Ndërkaq, Komiteti për Komunitete do të ketë nëntë anëtarë, katër nga subjektet politike dhe pesë nga komunitetet. Nga subjektet politike përfaqësimi do të jetë nga Luan Shllaku (AKR), Violeta Dema (AAK), Dafina Syla (PDK) dhe Genta Domi (LDK). Komisioni për plotësimin dhe ndryshimin e Statutit të Komunës së Gjakovës është i përbërë prej shtatë anëtarëve, katër prej të cilëve nga subjektet politike, Genti Olloni (AKR), Hamëz Cena (AAK), Ilir Beqiri (PDK), dhe Drini Haraqia (LDK). Një anëtar do të jetë nga Komuna, që është emëruar Flamur Vula, ndërsa dy anëtarë tjerë janë nga shoqëria civile, Lirie Dula Halilabazi dhe Arbnor Pula. Ndërkaq, për komitetet tjera si dhe Komisionin për Identifikimin dhe Dhënien në Shfrytëzim të Banesave të Banimit Social ëshët përcaktuar që deri të premtën, me datë 24.01.2014 nga partitë politike të deponohen emrat, varëisht prej përcaktimit numerik, nga shtatë sish, si dhe përbërjes strukturale politike.
Në pikën të ndryshme të rendit të ditës ka patur edhe disa debate të cilave u parapriu Saranda Hyseni nga subjekti politik AAK, që kishte të bënte me pyetjet e parashtruara për kryetaren e Komunës për stafin e saj të kabinetit, për heqjen e pagesës së taksave, për kërkesën për lirimin e hapësirave të objektit nga subjekti politik AAK, për ndërprerjen e punimeve në Qendrën Kryesore të Mjekësisë Familjare, etj.
Në përgjegjet e saja, kryetarja e Komunës, Mimoza Kusari Lila, ka thënë se përsa i përket stafit të saj është në natyrën e punës që çdo ndryshim të qeverisjes të ketë dhe ndryshime në stafin e kryetarit, apo kryetares, dhe se kjo është transparente, përkudnër pushtetit paraprak që e ka stërmbushur administratën me militant politik. Ndërkaq, për taksën e hequr, kryetarja Mimoza Kusari Lila, ka thënë se këtë vendim e ka ndërmarrë për mosgjobitje të qytetarëve dhe në favor të interesave të tyre. Ndërsa, për lirimin e hapësirave të subjektit politik AAK që e kanë patur në shfrytëzim dhe që nga kryetarja Mimoza Kusari Lila është marr vendim që deri me datë 01.02.2014 ti lirojnë, kryetarja e Komunës ka pohuar se këtë vendim e ka ndërmarrur për të qenë të barabartë me të gjithë, e jo që objekti nga një parti politike të shfrytëzohet falas, ndërkohë që për hapësira tjera të paguhet qera. Ndërsa, përsa i përket punimeve të ndërprera në Qendrën Kryesore të Mjekësisë Familjare, kryetarja Mimoza Kusari Lila ka thënë se punimet kanë nisur pas zgjedhjeve, me datë tre dhjetor dhe ka qenë kundër kodit, e më pas ka patur edhe një avari në rrymë ku edhe është kërkuar ndërhyrja e prokurorisë.
“Kemi trashëguar borxhe të shumta, janë në pyetje 5 milion e dyqind mijë euro borxhe të trashëguara nga qeverisja e kaluar”, ka pohuar në kontest të qeverisjes së shkuar kryetarja Mimoza Kusari Lila.
