Më në fund filluan rinovimet për Shërbimin stomatologjik

Shërbimet stomatologjike qytetarët e Gjakovës ka kohë që po i marrin në sektorin privat sepse objekti i Qendrës Kryesore  të Mjekësisë Familjare nuk punon. Pas një periudhe pasiviteti pothuajse një vjet e gjysmë, këto ditë kanë filluar punimet në renovimin e katit të dytë të Qendrës Kryesore të Mjekësisë Familjare. Fillimin e punimeve e ka konfirmuar drejtori komunal për Shëndetësi, Basri Komoni, i cili ka bërë të ditur se për renovimin e këtij objekti komuna ka ndarë afër 60 mijë euro, ndërsa afati i kryerjes së punimeve është 70 ditë. Pas renovimit, kati i dytë i objektit të QKMF-së do të vendoset kryesisht në shërbim të repartit të Stomatologjisë, por në këtë kat do të funksionojë edhe administrata e QKMF-së dhe Sistemi Informativ Shëndetësor.

Ndryshe, punimet për renovimin e katit të dytë të QKMF-së ishin ndërprerë për shkak të një mosmarrëveshje në mes të komunës dhe kompanisë fituese për kryerjen e këtyre punimeve. Kjo kompani pas nënshkrimit të marrëveshjes kishte kërkuar mjete shtesë, por një gjë e tillë nuk ishte pranuar nga komuna dhe situata kishte shkuar  deri në prishjen e një anshme të marrëveshjes, konkretisht tërheqjes së kompanisë.