Në ambijentet e këndshme sportive tek Pallati i Sporteve, të hënën janë parë futbollistët e Vëllaznimit tek ushtronin në fushën e gjelbër sipas programit të shtabit teknik të prirë nga Arsim Gojani dhe trajnerëve Arben Lleshi dhe Veton Doli. Moti me diell dukej se u jepte inspirim për të realizuar më lehtë ushtrimet e kombinuara me vrapim dhe top. Stërvitjet i ka ndjekur edhe një grup i tifozëve të cilët mezi po presin startin e skuadrës së tyre të zemres në stinorin pranveror.
Sot ata i ka vizituar edhe një delegacion nga Holanda.
Nënkryetari klubit Artan Muhaxheri tha se brenda kësaj jave do të bëhen publike edhe përforcimet e radhes ndërsa gjatë gjysmës së parë të muajit shkurt do të prezantojë edhe autobusin zyrtar të klubit.
‘Më 18 Shkurt 2016, skuadra me këtë autobus do t’i drejtohet Shqipërisë për përgatitje në Shkëmbin e Kavajës, derisa do t’i ketë edhe disa ndeshje miqësore në kuadër të këtyre përgatitjeve’ ka thënë Muhaxheri.
Për dukjen e autobusit, është kujdesur dizajneri zyrtar i FC Vëllaznimi, Gurakuq Dobruna, i cili ka qenë kreator edhe i ambienteve në zyrat e reja të administratës së FCV.
