Nderohen të rënët e ngjarjeve të fundjanarit 1999

Nën patronatin e Komunës së Gjakovës,  të mërkurën, ne fshatin Rogovë u mbajt akademi përkujtimore, ndërsa në sallën e Shkollës së Muzikës “Prenk Jakova” është organizuar tubim promovues i  librit “Lufta dhe kujtesa kombëtare”, nga materialet shkencore kushtuar dëshmorëve të kombit  rënë me 27,28 dhe 29 janar të vitit 1999, në fshatin Rogovë të Hasit.

Në këtë promovim mori pjesë edhe kryetarja e Komunës Mimoza Kusari Lila,  përfaqësues të familjeve të dëshmorëve, personalitete, nga jeta ushtarake e politke, shkencore e shoqërore, si gjenerali  Kudusi Lame, kryetar i AAK-së Ramush Hardinaj,  Nazmi Ibrahimaj nga FSK-ja, e tjerë.

Për përmbajtjen dhe rendësinë e kësaj vepre  dhe për15 vjetorin e rënjes së dëshmorëve në janar të vitit 1999, në Rogovë të Hasit dhe në zonat tjera të UÇK-së, Kryetarja e  Komunës së Gjakovës Mimoza Kusari Lila, fillimisht ka thënë se “ për mua   ka qenë një nderë dhe kënaqësi e veçantë që ishim dhe jemi në gjendje që në mënyrë institucionale të shënojmë 15 vjetorin e renjës të dëshmorëve tanë në Rogovë të Hasit dhe të gjithë të tjerëve të Zonës Operative të Dukagjinit.

Ajo ka vlerësuar se lufta e Ushtrisë Çlirimtare e Kosovës është themel dhe bazament i shtetësisë së Kosovës.

“Lufta e Ushtrisë Çlirimtare e Kosovës, është ajo  e cila ka vendosur themelet dhe ka ndërtuar bazën e Shtetit të Kosovës”, ka saktësuar Kryetarja Kusari Lila, për të shtuar në vazhdim se “lufta dhe sakrifica e dëshmorëve të rënë për liri të vendit nuk duhet të mbetet në aspektin vetëm të nderimit, por duhet që ne, dhe gjeneratat tjera të vazhdojmë me punë dhe zell për të ndërtuar e zhvilluar vendin dhe shtetësinë e Kosovës”. Sipas saj “ Populli ynë gjeneratë pas gjenerate duhet të punojmë në vazhdimësi në ngritjen e  nivelit më të lartë të shtetësisë dhe zhvillimit të Kosovës. Populli ynë ka kaluar nëpër sfida të shumta dhe kurrë nuk duhet ta lejmë këtë sakrificë dhe mund pa e shkruar”.

Kryetarja Mimoza Kusari Lila, ka falënderuar prof. Emin Kabashin, që ka shkruar një histori të luftës së fundit në Kosovë. Sepse një libër si ky e cila trajton historinë e formimit dhe zhvillimin e UÇK-së, tregon për sakrificën trimërinë dhe heroizmin e djemve e bijave tona për lirin e Kosovës. Dhe kjo libër do të mbetet një histori e shkruar dhe e gjallë, për të treguar gjeneratave të ardhshme se ky vend është ndërtuar me mund, gjak dhe  sakrificë të madhe të atyre që ranë për liri’, ka thënë kryetarja Kusari Lila.

Prof. Emin Kabashi i cili në këtë libër ka bashkuar materialet dhe kumtesat shkencore , ka thënë se “Lufta e Ushtrisë Çlirimtare të Kosovës, ka zënë të bëhet kujtesë historike, jo vetëm në një krahë të kulturës Shqiptare, por edhe në gjithë përmasën e saj kombëtare. Në këtë rrjedhë është edhe botimi i materialeve të sesionit shkencor të mbajtur me 27 janar 2013, në Gjakovë.

Ai ka potencuar se dëshmorët e kombit të Luftës së UÇK-së, janë dëshmia historike për drejtësinë e kësaj lufte, gjë që del temë bosht e të gjitha kumtesave të mbajtur në këtë sesion shkencor. Në këtë promovim të librit “Lufta dhe Kujtesa Kombëtare”, ka folur edhe gjenerali Kudusi Lama, cili jo vetëm që ka vlerësuar lartë heroizmin e luftërave të UÇK-së, por ai ka thënë se nuk duhet që njërës pa kompetencë të anash kalojën dhe nënçmojnë gjakun dhe veprën sublime të UÇK-së.

Kryetari  i Aleancës për Ardhmërinë e Kosovës (AAK), Ramush  Haradinaj mori pjesë, pos në homazhet e organizuar në Rogovë të Hasit, edhe në ngjarjen tjetër, në Gjakovë, atë të promovimit të librit “Lufta dhe kujtesa kombëtare”, me material nga sesioni shkencor kushtuar ngjarjeve të 27-29 janarit të vitit 1999 dhe të rënëve në këto ngjarje.

“Rënia e tyre ishte frymëzim dhe forcë në luftën tonë, në çuarjen në fund të këtij misioni për lirinë dhe shtetin, në shtimin dhe rritjen e mëtejme të radhëve tona”, ka thënë kryetari Haradinaj në këtë manifestim nderimi në përvjetorin e 15-të të rënies së Agim Zenelit, Agron Ramës dhe 23 dëshmorëve dhe martirëve të tjerë të kombit.