Komuna e Gjakovës po llogaritet ndër komunat më të përgjegjshme që po respekton masat mbrojtëse kundër Virusit Corona. Kjo shihet në çdo rruge, shesh, park, në Komplekset tregtare dhe ato të bizneseve tjera. Çarshia e Madhe e Gjakovës, që njihet si ndër më të mëdhatë në Ballkan, gjatë kësaj periudhe të masave ka ngelur e zbrazët.
Nuk punojnë as ata pak zejtarë me të cilët tipizohet kjo Çarshi ndërsa kompleksit të kafeterive, ku frekuenca më e madhe krijohet nga të rinjtë, u mungojnë vizitoret ( në respektimin e masave). Këto ditë as Qendra Kryesore e Mjekësisë Familjare nuk ka punë si zakonisht. Duket se Virusi na ka “futur” frikën. Po frikësohemi edhe të ankohemi!!! Në këtë kohë pandemie edhe sahati i Kullës ka ndaluar së punuari!
E meqenëse nuk ka lëvizje andej pari, në kalldrëmin e Çarshisë së Madhe ka filluar të dalë bari! Kjo hetohet edhe në këto foto të shkrepura sot në mesditë (21 Prill, në një ditë me shi). Kush ka menduar se do të përjetojmë edhe një fenomen të tillë në “zemrën” e Gjakovës?
Mirëpo, na mban shpresa se ky bar rrugëve do të hiqet shpejtë dhe Çarshia do të gjallërohet e do ti kthehet përditshmërisë së zhurmshme andej pari.
Në anën tjetër kalldrëmi me kocka, pasi më parë është ndërtuar infrastruktura dhe është shtrirë me beton, në disa rrugë veç ka filluar të vendoset siç shihet në foto. Komuna po thotë se do ti shtrojë kështu të gjitha rrugët e Çarshisë.
