Në Spitalin e përgjithshëm Isa Grezda sipas raportit të sotëm gjendja është vështirësuar tej mase me numrin në rritje të dyshuarve me korona virus që po kërkojnë ndihmën mjekësore. Hilmi Shala, ushtrues i detyres së drejtorit të spitalit tha se sot është arritur numri më i lartë i pacientëve që janë shtrirë në repartet e spitalit si të dyshuar.
“Janë të shtrirë 114 pacientë duke iu afruar kapaciteteve spitalore që janë 135 shtretër. Janë 74 pacientë të konfirmuar me Covid 19, por 80 pacientë janë në oksigjenoterapi , 4 në CPAP maskë dhe 3 të intubuar”, ka thënë Shala duke tërhequr vemendjen se kjo është gjendja më e rënduar nga fillimi i pandemisë. Infektimit me koronavirus nuk i kanë shpëtuar as mantelbardhët e spitalit. Me covid pozitiv janë 3 mjekë, 6 infermier dhe 4 nga stafi tjeter mjekësor i spitalit. Drejtori Shala, bazuar në gjendjen tejet të rënduar me Covid 19, ka thënë se vetëm respektimi i masave anticovid për bartje të maskave, ruajtjes së distances sociale dhe higjenes, mundë ta ulë numrin kaq të madh të të infektuarve.
Ndryshe, gjatë 24 orëve të shkuara janë infektuar edhe 40 persona nga komuna e Gjakovës duke e ngritur numrin e përgjithshëm në 1 mijë e 714 persona me Covid 19.