Një herë telashe me vërshimet tash edhe me mungesën e energjisë elektrike

Gjakova ka kaluar një ditë të rëndë pas reshjeve të mëdha të shiut dhe borës, ndërkohë që sot, e shtunë, , pas ndërprerjes së reshjeve gjendja tregohet më e qetë. Niveli i ujit të lumenjve ka rënë dukshëm,  ka thënë Besim Meqa, nga Drejtoria për Mbrojtje dhe Shpëtim. Ai tha se kanë vizituar të gjitha pikat më të rrezikuara, dhe sot gjendja tregohet më e qetë, pos tek zona prapa Xhateksit, ku uji ende nuk ka rënë në shtrat dhe banorët aty nuk mundë të kthehen.

“Nga mesnata kur janë ndalë reshjet e shiut, situata ka filluar të normalizohet, ndërkohë që edhe sot në disa lagje, nëpër bodrume të shtëpive por  edhe në fshatra ende ka ujë”, ka thënë Meqa.

Ai ka kujtuar sfidat e ditës së djeshme në luftën me vërshimet.

“Të gjitha institucionet komunale emergjente kanë qenë të mobilizuara për ti dhënë ndihmë banorëve të rrezikuar posaçërisht në zonat ku lumenjtë kishin dalë nga shtrati si në qytet ashtu edhe në fshatra.

Rreth 70 banorët  mbrëmë janë  evakuuar, nga zona e Brekocit dhe disa që kanë banuar në veri, tek ish Xhateksi prej mbrëmë  janë strehuar përkohësisht në ambientet e Aeroportit të Gjakovës, vend ky i cili plotëson të gjitha kushtet për një jetë normale.

Kryetari I Komunës Ardian Gjini, gjatë vizitës së sotme  është siguruar se këta banorë po marrin përkujdesjen e duhur.

“Deri në normalizimin e situatës, këta banorë do të qëndrojnë këtu dhe bashkë me shtabin do të vazhdojmë t’iu ofrojmë kushte normale për jetesë. Ndërkohë, shumë shpejtë do të nisim një plan konkret për zgjidhjen e përhershme të problematikës me të cilën ata përballen gati çdo vit” u shpreh ndër të tjera Kryetari Gjini.

Në mënyrë që të jetë sa më afër qytetarëve, për çdo vështirësi që paraqitet nëpër lagje, komuna lut qytetaret të telefonojnë në Qendrën e Thirrjeve Emergjente përmes numrit 112. Komuna premton se do të jetë në shërbim me të gjitha kapacitetet për të minimizuar problemin.

Kur jemi tek pasojat e motit që mbretëroi në territorin e komunës së Gjakovës, banorët e Rekës së keqe krahas telasheve me reshjet e mëdha, kanë edhe hallin e madh me mungesën e energjisë elektrike. Disa banorë të kësaj zone i kanë thënë Radio Gjakovës të shtunën se,  dy net e tri ditë kanë ngelur pa drita.