Orkestra kamertale e Gjakovës e gatshme për publikun Vjenez

Orkestra Kamertale e Shkollës së Muzikës “Prenk Jakova”, para prezantimit të hënën në Austri,   mbrëmë ka shfaqur koncertin me titull Evropa na bashkon-Dialog përmes muzikës”. Para publikut gjakovarë, në sallën e mbushur dhe dirigjimin e Pëllumb Vulës dhe Kastriot Sades, ka interpretuar vepra të kompozitorëve të njohur. U interpretuan për mrekulli 4 vepra muzikore, ndërkohë që emocione të veçanta zgjuan veprat e luajtura “Në filim të verës” nga Kujtim Laro dhe “Baresha” e Rexho Mulliqit. Instrumentistët në bashkëpunim me violinistin austriak  Johannes Fleischmann dhe Momoko Aritom nga Japonia në violë, u duartrokiten në fund të koncertit.

Të dy artistëve mysafir , shkolla e muzikës Prenk Jakova iu ndau mirënjohje për bashkëpunim, ndërkohë që drejtoresha e Arsimit Eranda Kumnova Baçi përgëzoi orkestrën e bindur se me sukses do të prezantoj veprat muzikore në Austri.