Mrekullia Muzikore e Gjakovës
Nuk e kanë thënë kot: Gjakova e muzikës. Zëra me potencial të lartë muzikor janë bashkuar në një mbrëmje të paharruar, pas koncertit që iu kushtua 80 vjetorit të Ismet Pejës. 14 Qershori, që njihet si Dita e Çlirimit të Gjakovës, këtë vit do të mbetet e paharruar edhe për një takim dhe këndim krejt të rastësishëm që nxori ”flakë” këngë të vjetra, ndoshta të padëgjuara me vite. Rastësi të tilla ndodhin shumë rrallë, ndoshta një herë!. Të jenë bashkë breza të rinj e të vjetër këngëtarësh bashkë, kjo ngjau në hotelin President pas koncertit.
Ishte Ismet Peja, Zenel Doli, Shkëlzen Jetishi, Edi Furra, Edi Ermeni, Gent Bytyqi pastaj, dikur “vashat me borziloke”, ndër të parat këngëtare të qytetit tonë, që dikur pushtuan skenat tona:, Hazbije Dautaga- Meqa, Borëbardha Riza- Gjini, Mandushe Muhaxhiri – Bakija etj që po ia thonin këngëve të bukura popullore…
Ka mjaftuar një mikrofon dhe asnjë instrument muzikor për tu krijuar mrekullia vet. Mysafirët, pjesëmarrës në koncertin e Ismet Pejës po shfaqnin impresionet e tyre me këngë të bukura, këngë të shpirtit që nuk harrohen kurrë.
Baca Ismet në këtë mbrëmje duket se e ka harruar lodhjen, plakjen… Zëri i shkon pushkë me “Ofait gjakovare” dhe “Jaret shkodrane”. Ndërkaq kur këndohen këngët e Fitnete Rexhës, Hafsa Zyberit e të tjerave soliste, ngritët më lartë zëri i Hazbijes, Dushit, Bardhes…Mrekullia vet, sepse të kujton ato vitet rinore kur ato këndonin në skenat e Gjakovës. Për Zenelin, Xenin, të dy Edat, Gentin kjo mbrëmje dukej se nuk do të mbaronte kurrë. Xenin kurrë nuk e kam parë më të disponuar. Ai këndoi shumë këngë që ka vite që nuk i kam dëgjuar! Secili në atë brezin e vet të zërit dhe interpretimit. Secili ka adhuruesit e vet, por sonte kënduan për “pikë të qejfit” e “për hatër” të Ismet Pejës që e kurorëzoi një përvjetor siç është më së miri- me këngë…
Një buqetë e bukur zërash dhe brezash, një pasuri, një trashëgimi kulturore e shpirtërore e Gjakovës së muzikës… Ju lumtë! (Zeki Vehapi)
