Saturday, April 6, 2024
AktualeLajmeLajmet e shpejta

Për një javë mbi 6 mijë pacientë të prekur nga ftohjet sezonale

Muaji Dhjetor jo vetëm që ka ardhë me temperatura të ulëta, mjegull dhe brymë dimërore, por ka sjellë me vete edhe ftohjet sezonale. Një nga bisedat e para të këtyre ditëve janë ankesat për teshtitje, temperaturë, ethe, dhimbje koke e tj, gjitha simptoma të gripit.   Në Qendrën Kryesore të Mjekësisë Familjare në Gjakovë dhe në Qendrat e Mjekësisë Familjare bashkë me farmacitë e qytetit,  është rritur në mënyrë tejet të madhe numri i pacientëve të cilët janë të atakuar nga ftohjet e gripit sezonal.

Dr. Viloleta Xërxa-Thaqi, thotë se për shkak të numrit të madh të pacientëve është kërkuar edhe të rritet numri i mjekëve për të përballuar këtë fluks të pacientëve.

Derisa gjatë javës së parë të muajit nëntor numri i pacientëve  që kanë kërkuar ndihmë mjekësore ka qene mbi 4 mijë,  gjatë javës së parë të muajit dhjetor ky numër është rritur për 1 mijë e 500 përsona, duke arritur në 6.150 .

Ftohja e zakonshme dhe gripi janë gjendje të cilat japin simptoma lokale nga hunda, fyti dhe veshi, si edhe simptoma të përgjithshme, temperaturë dhe ethe. Ftohja e zakonshme dhe gripi mund të paraqiten në disa forma, duke filluar nga ato më lehtat deri te format e rënda. Te ftohja e zakonshme, simptomat e para paraqiten në fyt dhe mbesin si simptoma kryesore. Ndërsa te gripi dominojnë: ethet, dhimbja e trupit, mundimi në stomak, plogështia, si edhe simptomat tjera të përgjithshme.

Ftohja shkaktohet nga viruse të ndryshëm, të cilët e ndryshojnë formën e tyre gjatë shumimit. Ftohja e zakonshme mund të transmetohet me anë të teshtitjes apo kollitjes, kur spërklat nga personi i sëmurë pranohen dhe thithen nga personi i shëndoshë.