Brenda vitit 2013, Gjakova është shtuar për një mijë e 261 banorë të rinj mirëpo këto të dhëna nuk janë plotësisht të sakta, për faktin se janë sëpaku edhe 300 raste të lindjeve që nuk janë lajmëruar në sektorin e ofiqarisë siç kërkohet me sistemin e ri të regjistrimit . Ndryshe sipas të dhënave ekzistuese të sektorit të Statusit Civil të Kuvendit Komunal të Gjakovës, gjatë vitit 2013 në komunën e Gjakovës kanë lindur 1 mijë e 623 foshnja , ndërsa kanë vdekur 362 persona. Po ti shtohen edhe rastet e lindjeve të paevidentuara, atëherë numri i lindjeve i afrohet trendëve të viteve të kaluara.
Teuta Vokshi udhëheqës në sektorin e Statusit Civil të Kuvendit Komunal të Gjakovës theksoi se me sistemin e ri të regjistrimit prindërit janë të obliguar që të bëjnë regjistrimin e foshnjës, ndërsa vonesat e regjistrimit tërheqin edhe ndëshkimet materiale.
Edhe numri i kurorëzimeve ka shënuar rënie për 93 raste. Sivjet janë kurorëzuar 753 çifte bashkëshortore ndërsa në vitin 2012 kishte 980 raste. “Në regjistrat e lindjes të Kuvendit Komunal bashkë me 12 Zyrat e Vendit nëpër fshatra, për vitin 2013 janë regjistruar 1.623 lindje, që është për 1.267 foshnja më pak se në vitin paraprak. Ndërkaq këtu nuk janë përfshirë rreth 300 raste kryesisht të muajve nëntor e dhjetor të vitit 2013 sikurse edhe regjistrimet e lindjeve nga bota e jashtme kur prindërit janë nga komuna e Gjakovës. Ne vitin 2012 kishte rreth 600 raste të tilla. ” tha Vokshi.
Ndryshe në këto shifra nuk janë llogaritur edhe ndonjë rast i lindjeve, kryesisht në zonat rurale, që nuk ka bërë regjistrimin e lindjeve, për çka Vokshi fton bashkëqytetarët që të regjistrojnë këto raste.
Në anën tjetër në repartin Obstetrik të Spitalit Rajonal “Isa Grezda” të Gjakovës thonë se gjatë vitit 2013 kanë lindur 2 mijë e 205 foshnja apo 50 foshnja më shumë se një vit më parë. Vetëm nga komuna e Gjakovës kanë qenë 1.260 lindje nga të cilat ka edhe foshnja binjake, ndërsa në Spitalin Rajonal “Isa Grezda” të Gjakovës 945 raste të lindjeve janë nga komunat e regjionit: Rahovec, Malishevë, Malësi e Gjakovës e vise tjera që marrin shërbimet specialistike mjekësore në këtë qendër.
Udhëheqësi i repartit obstetrik në Spitalin Isa Grezda, doktor Naser Xharra, thotë se trendët e lindjeve janë të njëjta me vitin paraprak. Sipas tij vetëm viti 2012 krahasuar me 2011-ten ka pasur rënie për 20%. Sipas shërbimit të ofiqarisë në Kuvendin Komunal të Gjakovës, bashkë me lindjet dhe kurorëzimet, sipas statistikave vjetore shënojnë rënie edhe numri i rasteve të vdekjes. Në vitin 2013 në komunën e Gjakovës kanë vdekur 362 persona, ndërsa më 2012 ka pasur 449 të vdekur që do të thotë se kishte 87 raste të vdekjeve më pak.(gjakovapress.info)
