Friday, March 29, 2024
AktualeLajme

Prej 39 vreshtarëve vetëm dy nga Gjakova përfitojnë nga grandet e Ministrisë së Bujqësisë

Ministria e Bujqësisë, Pylltarisë dhe Zhvillimit Rural ka nënshkruar kontrata për ndarjen e granteve investive për mbështetjen e 39 projekteve të vreshtarëve në vlerë prej rreth 210 mijë  euro. Përmes këtyre granteve investive, synohet rritja e sipërfaqeve me vreshta të reja dhe modernizimi i infrastrukturës përcjellëse në këtë sektor. Tridhjetë e nëntë vreshtarët përfitues, mes të cilëve edhe dy vreshtarë nga komuna e Gjakovës që  i nënshkruan këto kontrata, do të financohen në shkallë prej 65 për qind nga Ministria e Bujqësisë.

Ministri i Bujqësisë, Blerand Stavileci, tha se me këtë sektor po fillojnë edhe realizimin e programit mbështetës të këtij viti, ngase vreshtaria është njëri prej sektorëve, për të cilin viteve të fundit iu është dhënë përkrahje maksimale. E duke ditur rëndësinë e këtij sektori dhe problemet më të cilat është ballafaquar, krahas këtyre grandeve investive, pjesë e programit janë edhe subvencionimi i sipërfaqeve ekzistuese të vreshtave me nga 200 euro për një hektardhe subvencionimi i stoqeve të verës.

Në Ministrinë e Bujqesisë  thonë se vetëm dy fermerë janë nga komuna e Gjakoves si  përfitues të kësaj mbështetje, njeri prej të cilëve nga familja Batusha  për hapjen e 5 hektarëve me vreshta të reja. 33 përfitues i takojnë komunes se Rahavecit dhe 4 janë nga komuna e Therandes.

Gjakova dikur ka qenë qendra prijetare  kosovare e vreshtarisë dhe prodhimtarisë së rrushit, ndërsa ka disa dekada që ka ngelur shumë prapa.

Ndryshe, Kosova ka kushte agroklimatike shumë të përshtatshme për zhvillimin e sektorit të vreshtarisë dhe deri më tani, Ministria e Bujqësisë, ka përkrahur gjithsej 585 projekte të vreshtarëve për ngritjen e plantacioneve të reja dhe rregullimin e atyre ekzistuese, që shprehur në hektarë ka përkrahur gjithsej ngritjen e 374 hektarëve të rinj me vreshta.