Në repartin e hemodializës të Spitalit rajonal Isa Grezda në Gjakovë në vazhdimësi i kushtohet kujdes pacientëve që kanë probleme të mëdha me funksionimin e veshkave. Këtu thonë se numri i pacientëve nga viti në vit po shtohet. Momentalisht janë 67 pacientë që rregullisht marrin shërbimet e dializës e të cilat prapa vete kanë një kosto të madhe. Kryesisht janë nga komuna e Gjakovës por ka edhe nga qendrat tjera komunale ndërsa prej këtij numri të përgjithshëm 5 apo 6 pacientë janë nga regjioni i Tropojes dhe Hasit të Shqipërisë . Nisur nga kërkesat e mëdha të pacientëve për këtë shërbim të rëndësishëm për jetën e pacientëve, vitin e kaluar kapacitetet e këtij reparti janë shtuar prej 65 në 90 pacientë. Personeli i këtij reparti po bënë punë të madhe në ndihmë të sëmurëve që i nënshtrohen këtij shërbimi mjekësor pasi kur ndodh dëmtimi i veshkave, dializa është trajtimi i nevojshëm për të zëvendësuar disa nga punët e rëndësishme që realizohen nëpërmjet veshkave.
