Wednesday, June 5, 2024
Aktuale

Shiu rrit nivelin e lumenjve- fermerët të kullojnë ujin e mbledhur nga grunajat

Lumi Krena

 

Reshjet e fundit të shiut që kanë përfshirë territorin e komunës sonë konsiderohen të mirëseardhura për aq kohë sa mbretërojnë temperatura të këtilla të larta. Sepse në të kundërtën, ngricat eventuale, në rrethana të mungesë së borës do të shkaktonin dëme të mëdha për kulturat bujqësore.

Në Drejtorinë Komunale të Bujqësisë në Gjakovë thonë se  nga reshjet e shiut mundë të kenë telashe vetëm ato sipërfaqe të mbjella në të cilat mblidhet sasi e madhe ujit e të cilat  nuk e kanë rregulluar sistemin e kullimit të ujit. Ata këshillojnë që fermerët në të këtilla raste duhet të intervenojnë duke hapur kanale të kullimit të ujit duke liruar sipërfaqet e mbjella me grurë nga uji i tepërt.

Ndryshe në këtë periudhë dimri gjendja e kulturave bujqësore të mbjella në vjeshtë vlerësohet të jetë e  mirë. Në komunën e Gjakovës janë të mbjella rreth pesë mijë hektarë me grurë.

Reshjet e shiut po bëjnë që të akumulohen edhe sasi të reja uji.  Në Kompaninë Rajonale të Ujësjellësit “Radoniqi”,  thonë se niveli i ujit në liqe ditë përditë po rritet nga katër centimetra. Prurjet e vazhdueshme nga lumi Lumbardh bashkë me sasitë e reja të ujit që mblidhen nga të reshurat, e bëjnë stabil nivelin e liqenit Radoniqi

për këtë periudhë kohore.

Pas reshjeve të shiut të ditëve të fundit janë  rritur edhe lumenjtë e Gjakovës, posaçërisht  Ereniku dhe Drini bardhë,  ndërkohë që lumi Krena ka mbushur cep më cep shtratin e tij të rregulluar brenda qytetit. Uji i rrëmbyeshëm i Krenës ka bërë njëkohësisht edhe pastrimin nga mbeturinat, të cilat po e shëmtojnë atë nga hedhja e pakontrolluar e inerteve dhe gjësendeve tjera.

Në fund të themi se padyshim se këto sasi uji që derdhen në Liqenin e Firzës do të ngrisin nivelin e liqeve akumulues dhe kështu të rrisin kapacitetet prodhuese energjetike.