Shiu telashe për naten e dytë të manifestimit SOFRA

Për shkak të kushteve atmosferike, është anuluar nata e dytë dhe e fundit e edicionit të dytë të Festivalit “Festa e Sofrës”. Sipas organizatorëve, shiu u rrëmbyeshëm që ka rënë në orët e pasdites, por edhe reshjet e herëpashershme gjatë orëve të mbrëmjes, e kanë bërë të pamundur vazhdimin e aktivitetit. Moti i lig gjithashtu i ka dëmtuar edhe disa pajisje teknike dhe elektrike, që poashtu ka ndikuar në rritjen e shkallës së vështirësisë dhe rrezikshmërisë për vazhdimin e programit. Ndryshe, Festivali që nisi të shtunën, në natën e parë ka mbledhur rreth vetës një numër të madh të qytetarëve, të cilët për disa orë me radhë janë argëtuar nën tingujt e zhanreve të ndryshme të muzikës, ndërsa që e kanë shijuar edhe ushqimin tradicional dhe pije të ndryshme.

Hapjen  solemne të këtij festivali e ka bërë e para e komunës së Gjakovës, Mimoza Kusari-Lila, e cila , duke e nderlidhur 15 Gushtin, nuk ka lënë pa i përmenduar me këte rast dy kolos të kulturës dhe dijes shqipe të cilët nuk janë më në mesin tonë: Bardhyl Qaushin dhe ak. Esat Stavilecin.

Ka qenë grupi Ashikët që me performancën e tyre e kanë hapur edicionin e dytë të “Festës së Sofrës”, ndërsa në pjesën argëtuese, në skenë janë paraqitur edhe Rona Nishliu me bendin e saj si dhe grupi Na. Në natën e dytë ishin paralajmëruar të performonin grupi “Hadi Bajrami”, në pjesën e muzikës tradicionale, si dhe Valon Shehu, Florent Abrashi e Grupi “Jericho” në pjesën e muzikës argëtuese.