Shkrihet bora shtohen shqetësimet e banorëve skaj lumit Krena
Periudha e reshjeve të shiut, bores dhe shkrirjes së ngricave shton telashet e dhjetëra kryefamiljarëve që jetojnë buzë lumit Krena. Ata, vazhdojnë ta ngrenë shqetësimin për rrezikun me të cilin po ballafaqohen shtëpitë dhe familjarët e tyre, për shkak të erozionit në përmasa të mëdha. Ata thonë se për shkak të gërryerjeve të dheut nga lumi, shtëpitë e tyre kanë mbetur nën mëshirën e natyrës. Prandaj, kërkesa e tyre, e përsëritur tash e disa herë në qeverinë lokale, është investimi për ndërtimin e shtratit të lumit.
Çështja e rregullimit të shtratit të lumit Krena ka një histori gati katër vjeçare. Pas nënshkrimit të memorandumit të mirëkuptimit ndërmjet Ministrisë së Mjedisit dhe Planifikimit Hapësinor dhe Komunës së Gjakovës për rregullimin e shtratit të lumit Krena me 28 qershor të vitit 2012 ndërmjet ministrisë përkatëse dhe Komunës së Gjakovës ishte planifikuar që ky projekt të zhvillohet gjatë viteve 2012, 2013 dhe 2014. Mirëpo po hyjmë edhe në vitin2015 dhe punët as që kanë filluar, ndërsa zotimet e Ministrisë së planifikimit hapësinor se gjatë muajve të fundit të vitit të kaluar, do të fillonin punimet shkuan huq. Ministria e Ambientit e ka përkrahur projektin me rreth 3 milionë euro për ndërtimin e shtratit të lumit Krena, projekt i cili ka filluar më 2013 me rregullimin e shtratit në një segment prej 140 metrash nga Taphanet deri te Ura e Taliqit.
