Shtëpitë e braktisura rrezik!

Janë rreth 15 shtëpi të braktisura në rrugën “Mbretëresha Teutë” në Gjakovë, e njohur si “Rruga e Serbëve”, që janë kthyer në ankth për banorët e kësaj lagjeje, në qendër të qytetit. Bëhet fjalë për shtëpitë e ish qytetarëve serbë, të cilët pas luftës janë larguar nga Gjakova, duke i lënë shtëpitë pa pronarë dhe në mëshirën e fatit, tashmë të shndërruara në gërmadha dhe deponi të egra mbeturinash,  e për më keq edhe në çerdhe të prostitucionit e narkomanisë.

Banorët e lagjes thonë se këto gërmadha paraqesin rrezik shumë të madh për ta, e më të rrezikuarit janë fëmijët, të cilët nga kureshtja fiminore, gjejnë lojë pikërisht në këto gërmadha. Veç që rrezikohen nga sëmundje dhe epidemi të ndryshme, ata mund të pësojnë edhe nga shembjet e objekteve, gjë që ndodhë shumë shpesh. E, ky shqetësim i banorëve të lagjes duket se ka gjet mbështetje në komunë, ku  bëjnë të ditur se zgjidhja e këtij problemi do të bëhet shumë shpejtë përkatësisht lagja mund të pastrohet nga këto gërmadha në një afat prej 10 apo 15 ditësh.